Այսօր ՀՀ ԱԳՆ-ում Հայաստանի ԱԳ նախարար Էդվարդ Նալբանդյանի և Շվեդիայի ԱԳ նախարար Կարլ Բիլդտի հանդիպումից հետո տեղի ունեցավ մամլո ասուլիս:
Շվեդիայի ԱԳ նախարարը նշեց, որ ԼՂ հակամարտության խաղաղ լուծմանն այլընտրանք չկա. «Խնդրի լուծման երկու կարևոր կետ գոյություն ունի՝ խաղաղ բանակցությունների միջոցով լուծումը և փոխհամաձայնության հասնելը: Կողմերից առաջին հերթին պահանջվում է փոխհամաձայնության հասնել, որի արդյունքն էլ կլինի վերջնական խաղաղության հաստատումը»: Կ.Բիլդտը կարևորեց, որ կողմերն օգտագործեն, կիրառեն ցանկացած հնարավորություն լարվածությունը թուլացնելու և բանակցություններում առաջ ընթանալու համար: «Ես մաս չեմ կազմել բանակցություններին և չեմ էլ ձգտում, չնայած մենք ամեն կերպ պատրաստ ենք մեր աջակցությունը ցուցաբերել հակամարտության խաղաղ լուծմանը հասնելու համար»,- ասաց Շվեդիայի ԱԳ նախարարը: Կ.Բիլդտը հավաստիացրեց նաև, որ իր երկիրը սատարում է հակամարտության խաղաղ կարգավորմանը և հուսով է, որ կողմերին կհաջողվի խաղաղ համաձայնության գալ մոտ ապագայում:
ՀՀ ԱԳ նախարար Էդվարդ Նալբանդյանը լրագրողներին հայտնեց, որ մեծ կարևորություն է տալիս սկանդինավյան տարածաշրջանի՝ հատկապես Շվեդիայի հետ Հայաստանի հարաբերությունների զարգացմանը: «Մենք հնարավորություն ունեցանք սկսել բանակցությունները երեկ երեկոյան, շարունակեցինք այսօր, քննարկեցինք երկկողմ, տարածաշրջանային, միջազգային հարցերի լայն շրջանակ: Անդրադարձանք Հայաստան-ԵՄ հարաբերություններին, հատկապես Արևելյան գործընկերության շրջանակներում, որի ճարտարապետներից է Շվեդիան: Մանրամասն քննարկեցինք Ասոցացման համաձայնագրի բանակցությունների ընթացքը, վիզային ռեժիմի դյուրացման գործընթացը, խոր և համապարփակ ազատ առևտրի գոտու ստեղծման բանակցությունների մեկնարկի նախապատրաստական աշխատանքները»,- տեղեկացրեց Է.Նալբանդյանը:
Ապա ՀՀ ԱԳ նախարարը նշեց, որ Շվեդիայի ԱԳ նախարար Կարլ Բիլդտի հետ հանդիպմանը անդրադարձել են նաև երկկողմ հարաբերությունների իրավապայմանագրային դաշտի ընդլայնման կարևորությանը, քաղաքական երկխոսության առավել ակտիվացմանը, տնտեսական, մշակութային, միջխորհրդարանական համագործակցության ընդլայնման հարցերին:
Է.Նալբանդյանին հարց ուղղեցին մուտքի արտոնագրային ռեժիմի դյուրացման շուրջ բանակցությունների առնչությամբ՝ արդյո՞ք այս պահին ժամանակացույց կա, թե դրանք ինչպես են ընթանալու, երբ են ավարտվելու, և ինչպիսի դյուրացում ենք ակնկալում: Է.Նալբանդյանը պատասխանեց, որ գալիք սեպտեմբերին մանդատ կտրվի վիզային ռեժիմի դյուրացման բանակցությունների մեկնարկի համար: «Դեռ բանակցությունները չսկսված՝ իհարկե, չենք կարող խոսել ավարտի մասին, բայց, կարծում եմ, կարող ենք վստահ լինել, որ բանակցություններն արագ են ընթանալու՝ նպատակ ունենալով դյուրացնել վիզային ռեժիմը քաղաքացիների տասնվեց կատեգորիաների համար՝ լրագրողների, մարզիկների, ուսման, բուժման, գիտական փոխանակումների նպատակներով մեկնողների համար: Հաջորդ փուլը նպատակ է ունենալու ազատականացնել վիզային ռեժիմը, այսինքն՝ վերացնել վիզաները»: