Այսօր լրագրողների հետ հանդիպման ընթացքում ԱԺ «Ժառանգություն» խմբակցության պատգամավոր Արմեն Մարտիրոսյանը, հարցին, թե հնարավոր համարո՞ւմ է ՀՀԿ-ՀԱԿ նույն դաշինքով ընտրություններին մասնակցությունը, պատասխանեց. «Ընտրություններին՝ էնքան էլ չեմ պատկերացնում, իսկ ընտրություններից հետո խնդիր չեմ տեսնում»:
Մարտիրոսյանը կանխատեսում է, որ խորհրդարանական ընտրություններին ՀԱԿ-ը և ՀՀԿ-ը կմասնակցեն առանձին, սակայն ընտրություններից հետո չի բացառում նման դաշինքի ստեղծումը:
«ԱԺ ընտրություններին կմասնակցեն առանձին-առանձին, հետո կձևավորվի նոր կոալիցիա, դա շատ տրամաբանական կոալիցիա կլինի, որովհետև արտաքին քաղաքական խնդիրների շուրջ բավական միանման մոտեցումներ կան, ներքին կառավարման շուրջ՝ նույնպես, էլ չեմ խոսում աշխատաոճի մասին, իսկ դա երբեմն ավելի կարևոր է»:
Ինչ վերաբերում է լրագրողների այն դիտարկմանը, թե հնարավո՞ր է, որ ՀԱԿ-իշխանություն երկխոսության արդյունքում նվազեն «Ժառանգության» ձայները, Արմեն Մարտիրոսյանը հակադարձեց, որ «Ժառանգության» ձայները կարող են պակասել միայն ընտրակեղծիքներով ուղեկցվող ընտրությունների պարագայում և ոչ թե ՀԱԿ-իշխանություն երկխոսությամբ:
