Թեպետ վարչապետ էրդողանի կուսակցությունը Թուրքիայի խորհրդարանի ընտրություններում կարողացավ ստանալ ընտրողների ձայների մոտ հիսուն տոկոսը, այնուամենայնիվ, ըստ թուրքագետ Ռուբեն Մելքոնյանի, չկարողացավ կատարել «մաքսիմում պլանը»՝ հավաքել 367 քվե, ինչը նրան թույլ կտար իրականացնել սահմանադրական փոփոխություններ և ուժեղացնել նախագահի ինստիտուտը:
Լրագրողների հետ հանդիպման ժամանակ ԵՊՀ Արևելագիտության ֆակուլտետի փոխդեկան Ռուբեն Մելքոնյանը նաև նշեց, որ այսուհետ իշխող կուսակցությունը ստիպված է բանակցել խորհրդարանում ներկայացված նոր քաղաքական ուժերի հետ, որպեսզի կարողանա կատարել իր առջև դրված խնդիրը և իրականացնել սահմանադրական փոփոխություններ. «Այսինքն՝ կարող ենք ենթադրել, որ նոր թուրքական իրականության մեջ սկսվում է քաղաքական առևտրի մի նոր փուլ, և միանշանակորեն այստեղ առաջնային է դառնում առաջիկա սահմանադրական փոփոխությունների հարցը»,- նշում է թուրքագետը։
