Տարածաշրջանային հետազոտությունների կենտրոնի ղեկավար Ռիչարդ Կիրակոսյանն այսօր լրագրողների հետ հանդիպման ժամանակ խոսեց Թուրքիայում անցկացված խորհրդարանական ընտրությունների և հայ-թուրքական հարաբերությունների վրա դրա հնարավոր ազդեցության մասին:
Կիրակոսյանը նշեց, որ խորհրդարանական ընտրություններից հետո Թուրքիայից Հայաստանի հետ բանակցողների դեմքերը կփոխվեն: Նրա խոսքերով՝ ֆուտբոլային դիվանագիտությունը Գյուլի նախաձեռնությունն էր, իսկ այժմ Հայաստանի հետ պետք է խոսեն էրդողանի ներկայացուցիչները: Կիրակոսյանը նաև նկատեց, որ Թուրքիայի հասարակությունը էականորեն դեմ չէ հայ-թուրքական գործընթացների վերսկսմանը և սահմանի բացմանը:
Ներկայացնելով թուրքական TESEV կենտրոնի իրականացրած հետազոտությունները՝ Կիրակոսյանը տեղեկացրեց, որ թուրք հասարակության համար բարեկամական երկիր է համարվում Իրանը, իսկ ԱՄՆ-ը՝ ոչ այնքան: Ըստ Կիրակոսյանի՝ նման վերաբերմունքը պայմանավորված է Իսրայելի և Պարսկաստանի հետ Թուրքիայի հարաբերություններով: Հայաստանը ոչ բարեկամական երկրների ցուցակում չի հայտնվել, ավելին՝ Կիրակոսյանի փոխանցմամբ, հարցվածների 50 տոկոսն աջակցում է հայ-թուրքական գործընթացին, 40 տոկոսը կողմ է սահմանի բացմանը։ Քրդական համայնքի 58 տոկոսը ևս կողմ է, որ հայ-թուրքական սահմանը բացվի: Այդուամենայնիվ, Կիրակոսյանի գնահատմամբ, այսօր Թուրքիայի առջև նոր մարտահրավերներ են առաջացել՝ մասնավորապես Սիրիայի և Լիբիայի հարցը, իսկ հայ-թուրքական գործընթացը այս պահին քիչ կարևոր է: Ռիչարդ Կիրակոսյանը նկատեց, որ Թուրքիայի նորընտիր իշխանությունների համար այս պահին հայ-թուրքական արձանագրությունները վերսկսելու ցանկություն չկա, թերևս, այն ավելի ուշ կքննարկվի: