Այսօր Ամերիկայից ժամանած փորձագետ Սեդա Պապյանը տեղեկացրեց, որ Հայաստանի ստանդարտացման ազգային ինստիտուտը ստացել է ISO2001 որակի կառավարման մրցանակը: Ստանդարտացման ազգային ինստիտուտի տնօրեն Ենոք Ազարյանը նշեց, որ ինստիտուտն իրականացնում է հիմնականում առաջին փորձագիտական ստանդարտացում, լաբորատոր փորձագիտություն և որակի կառավարման ստանդարտացում:
Չնայած ինստիտուտը ստացել է որակի նման միջազգային մրցանակ, սակայն փակ աչքով էլ ակնհայտ է, որ հայաստանյան շուկայում մեծամասամբ ապրանքները չեն համապատասխանում իրական ստանդարտներին, հետևաբար լրագրողները Ազարյանից հետաքրքրվեցին՝ ինչ երաշխիքներ կան հայաստանյան շուկայի ապրանքների դեպքում, որոնք մատուցվում են սպառողներին և չեն համապատասխանում առկա ստանդարտներին։ Ի պատասխան՝ վերջինս արձագանքեց, որ 100 տոկոսանոց երաշխիքներ չկան, իսկ ստանդարտավորում անցած ապրանքատեսակները կարող են տարբերել ապրանքի վրա փակցված ՀՍՏ տարբերանշաններով: Սակայն չբացառեց, որ շատ հաճախ սպառողներին մատուցվող ապրանքատեսակները չեն համապատասխանում սահմանված ստանդարտներին:
Մեր հարցին, թե ի՞նչ վիճակ է տիրում քաշի առումով, պատասխանեց, որ շատ հաճախ ոչ միայն կշեռքներն են սխալ կշռում, այլև խոնավացման եղանակով շաքարի քաշն է ավելացվում, ջրի միջոցով կարագինը, հացի քաշն է սխալ կշռվում: Հացի խմորը համապատասխան հասունացում չի անցնում, և այլն: Իսկ թե ինչ կանխարգելիչ միջոցառումներ են անցկացվում այս ուղությամբ՝ նշեց, որ շրջայցեր են կատարում, արձանագրվում են փաստեր, սակայն թե ինչ պատիժներ են սահմանվում՝ ինքը տեղյակ չէ: Ենոք Ազարյանը բերեց եվրոպական երկրների օրինակը՝ նշեց, որ այնտեղ ստուգայցեր հազվադեպ են իրականացվում, իսկ եթե խախտման դեպք է արձանագրվում՝ բիզնեսմենը վերանում է որպես այդպիսին: Ի դեպ, նրանից տեղեկացանք, որ Հայաստանում պարբերաբար ստանդարտացում են անցնում 100-ին մոտ խոշոր կազմակերպություններ, որոնց վարկանիշի համար պարզապես անհրաժեշտություն է ստանդարտ ունենալը, իսկ հայաստանյան շուկայում գործող մանր ու միջին ընկերությունները, ըստ ինստիտուտի տնօրենի, չեն պատկերացնում ստանդարտի խնդիրը: