Այսօր Շվեդիայի ԱԳ նախարար Կարել Բիլդտը ՀՀ ԱԳՆ-ում Էդվարդ Նալբանդյանի հետ բանակցություններից հետո հրավիրված համատեղ մամլո ասուլիսում անդրադարձավ ղարաբաղյան հակամարտության կարգավորման ներկա փուլին, խոսեց նաև Կազանի հանդիպման հնարավոր զարգացումների մասին:
«Առաջին լրատվականը» հարց ուղղեց Էդվարդ Նալբանդյանին՝ վերջերս Ադրբեջանի ԱԳ նախարար Էլմար Մամեդյարովի հայտարարության առիթով, թե համաձայնություն է ձեռքբերվել խաղաղապահների տեղակայման հարցում և դրանք չեն կարող լինել ԵԱՀԿ ՄԽ-ի համանախագահող երկրները և տարածաշրջանի երկրները:
ԱԳ նախարարին «Առաջին լրատվականը» խնդրեց մանրամասնել, թե եթե այս սկզբունքի շուրջ համաձայնություն կա, ո՞ր փուլում են տեղակայվելու խաղաղապահները և ո՞ր երկրների խաղաղապահներ են դրանք լինելու:
«Դրանք սխալ մենաբանություններ էին: Դուք գիտեք այն վեց դրույթների մասին, որոնք հրապարակվել էին նախագահներ Օբամայի, Սարկոզիի, Մեդվեդևի կողմից Ակվիլայում և Մուսկոկայում, այդ վեց դրույթների մեջ կա նաև խաղաղապահ օպերացիա ԼՂ-ի շուրջը: Բայց այս հարցը երբևէ վերջին երեք տարիների ընթացքում չի քննարկվել: Տարօրինակ է մեկնաբանել, որ ինչ-որ պայմանավորվածություն է ձեռքբերվել. չէր կարող պայմանավորվածություն ձեռքբերվել, եթե չի քննարկվել այդ հարցը»:
Մենք հնարավորություն կունենանք անցնել երկրորդ փուլին, երբ ոչ միայն Հայաստանը և Ադրբեջանը, այլև Ղարաբաղն իր համաձայնությունը տա հիմնարար սկզբունքներին:
Հնարավո՞ր է, որ Կազանում փաստաթուղթ ստորագրվի՝ հարցրեցին լրագրողները. «Գիտեք որ ԱԳՆ-ն հաղորդագրություն էր տարածել վերջերս Մոսկվայում նախարարների մակարդակով կայացած եռակողմ հանդիպման առիթով, որտեղ ասվում էր, որ կողմերին հաջողվել է մոտեցնել դիրքորոշումները մի շարք առանցքային հարցերի շուրջ, և եթե այս դրական միտումը պահպանվի նաև Կազանում, ապա կկարողանանք առաջընթաց արձանագրել»: Է.Նալբանդյանը նաև շեշտեց, որ Դովիլի համատեղ հայտարարության մեջ եռանախագահող երկրների նախագահները հստակ կոչ են անում պատրաստել ժողովուրդներին խաղաղությանը, հակառակը կդատապարտվի միջազգային հանրության կողմից: «Ո՞վ է խանգարում ադրբեջանցիներին օգտագործել այս շանսը»,- նշեց ՀՀ ԱԳ նախարարը՝ անդրադառնալով ադրբեջանցի պաշտոնյաների ռազմատենչ հայտարարություններին:
Ե՞րբ է նախատեսվում ԼՂ-ի մասնակցությունը բանակցային գործընթացին. «Ես լիովին համամիտ են նախագահ Բակո Սահակյանի հայտարարության հետ: Անհնար կլինի անցնել երկրորդ փուլին, եթե ԼՂ-ի կողմից համաձայնություն չլինի հիմնարար սկզբունքների վերաբերյալ: Իսկ երկրորդ փուլը նախատեսում է մշակել, պատրաստել կարգավորման պայմանագիրը, այդ բանակցություններին ԼՂ-ն միանշանակ պետք է մասնակից լինի: Մեզ համար խաղաղ կարգավորման հիմնաքարն այն է, որ ԼՂ-ի ժողովուրդն է իր ճակատագրին տերը»:
