Արժույթի միջազգային հիմնադրամի գործադիր խորհուրդը կքննարկի երկու թեկնածություն այդ կառույցի ղեկավարի պաշտոնի համար: Թեկնածուներն են Ֆրանսիայի էկոնոմիկայի նախարար Քրիստին Լագարդը և Մեքսիկայի Կենտրոնական բանկի ղեկավար Աուգուստին Կարստենսը: Այս մասին հայտնի է դարձել տնօրենների խորհրդի նիստից հետո տարածված մամլո հաղորդագրության մեջ:
Դրանում նշվում է, որ թեկնածուների փաստաթղթերի ներկայացման ժամկետն ավարտվել է հունիսի 10-ին: ԱՄՀ-ն նոր ղեկավար կունենա մինչև հունիսի 30-ը: Հաղորդագրության մեջ ասվում է, որ մինչ ընտրությունը գործադիր խորհուրդը Վաշինգթոնում հանդիպումներ կունենա երկու թեկնածուների հետ, որպեսզի քննարկվեն «թեկնածուների ուժեղ որակները»:
Հիշեցնենք, որ ԱՄՀ ղեկավարի պաշտոնը թափուր է մնացել այն բանից հետո, երբ Նյու Յորքում սեռական ոտնձգության մեղադրանքով ձերբակալվեց կառույցի այդ ժամանակ գործող ղեկավար Դոմինիկ Ստրոս Կանը, ինչից հետո նա հրաժարական տվեց: