ԱՄՆ պետքարտուղարությունը համարում է, որ Սև ծովում ԱՄՆ-ի և Ուկրաինայի համատեղ զորավարժություններն այդ երկու երկրների միջև սերտ համագործակցության ապացույցն են, իսկ Մոսկվան իրավունք ունի դրա մասին կարծիք հայտնելու: Այս մասին հայտարարել է ԱՄՆ պետքարտուղարության պաշտոնական ներկայացուցիչ Մարկ Թոները:
«Նրանք (ռուսները.– 1in.am) կարծիք հայտնելու իրավունք ունեն: Ես չեմ պատրաստվում վերլուծել Ռուսաստանի արտաքին գործերի նախարարության խոսքերը, և ես պետք է լրացուցիչ տեղեկություններ ստանամ այդ զորավարժությունների մասին: Սակայն մենք ամենասերտ կապերն ունենք Ուկրաինայի հետ, իսկ այս զորավարժությունները տեղավորվում են այդ գործընկերության մեջ»,- ասել է Թոները, որի խոսքերն է մեջբերում RIA-Novosti գործակալությունը:
Հիշեցնենք, որ Ռուսաստանի արտաքին գործերի նախարարությունը երեկ իր վրդովմունքն էր հայտնել ամերիկյան «Մոնտերեյ» հածանավի՝ Սև ծով մուտք գործելու կապակցությամբ: