Վերջին մեկուկես ամսվա ընթացքում ԱՄՆ-ը ներկայացուցիչները փակ բանակցություններ են անցկացնում Աֆղանստանի իշխանությունների հետ՝ երկարաձգելու համար ամերիկացիների ներկայությունը Աֆղանստանում և ռազմական համագործակցությունն աֆղանցիների հետ, ինչը հայտնի է դարձել Հնդկաստանին, Ռուսաստանին և Չինաստանին, որոնք Վաշինգտոնին արդեն տեղեկացրել են ամերիկացիների՝ Աֆղանստանում ներկայությունը երկարացնելու փաստի վերաբերյալ իրենց դժգոհության մասին: Այս մասին գրում է The Guardian-ը:
Արդեն գոյություն ունեցող պայմանավորվածությունների համաձայն, ԱՄՆ զինվորական ներկայությունը պետք է վերացվի մինչև 2014 թ.: Սակայն Վաշինգտոնը, որը կասկածում է, թե իրավիճակը տարածաշրջանում մինչ այդ կկայունանա, փորձեր է անում երկարացնելու զինվորականների ներկայությունն Աֆղանստանում նաև 2014 թվից հետո:
ՆԱՏՕ-ում և Սպիտակ տանը թերթի աղբյուրներն ասել են, որ թեպետ Աֆղանստանում զորքերի ներկայության հարցը իրավական լուծում դեռ չի ստացել, սակայն իրենք նախատեսում են, որ 2014 թվից հետո էլ մնալու են այդ երկրում:
The Guardian-ը շեշտում է, որ Աֆղանստանին մոտ գտնվող Ռուսաստանը, Չինաստանը և Հնդկաստանն արդեն իրենց մտահոգությունն են արտահայտել այս կապակցությամբ, և փորձում են համոզել Աֆղանստանին՝ չհամաձայնել ՆԱՏՕ-ի և ԱՄՆ զորքերի ներկայության երկարաձգմանը: Աֆղանստանում ՆԱՏՕ-ի ներկայացուցիչ Մարկ Սեդվիլը, մեկնաբանելով այս իրավիճակը, համեմատել է այն 19-րդ դարում Ռուսաստանի, Անգլիայի և Հարավարևելյան Ասիայի որոշ երկրների հակամարտության հետ, ավելացել են միայն նոր խաղացողներ և ճնշման նոր գործիքներ:
