Ադրբեջանական APA լրատվական գործակալության փոխանցմամբ՝ Սիրիայում շարունակվող բախումների արդյունքում գնալով մեծանում է դեպի Թուրքիա հեռացող փախստականների թիվը։ Թուրքիայում սիրիացի փախստականների թիվն արդեն հասել է 7000-ի։ Ակնկալվում է, որ մոտ ժամանակներս սիրիացի փախստականների հոսքի տեմպը չի ընկնի։
Թուրքական իշխանությունները սիրիացի փախստականներին տեղավորում են 4 խոշոր ճամբարներում։ ՄԱԿ-ի տվյալներով, ևս 5000 փախստական գաղթել է Լիբանան։
Փախստականները պատմում են, որ սիրիացի զինվորականները երկրի հյուսիսում գտնվող Ջիսր Ալ-Շուղուր քաղաքի շուրջն ընկած գյուղերում ձերբակալել են հարյուրավոր մարդկանց։
Հիշեցնենք, որ օրեր առաջ Ջիսր Ալ-Շուղուրում սպանվել էր Սիրիայի ուժային կառույցների 120 ներկայացուցիչ, որից հետո սիրիական բանակը գրավել էր ապստամբ քաղաքը։ Այդ ամենի արդյունքում Թուրքիայում զգալիորեն ավելացավ սիրիացի փախստականների թիվը։
Եթե մինչ այդ դեպքերը՝ մոտ երեք ամսվա ընթացքում (մարտի կես-հունիսի կես), Թուրքիայում գտնվում էր ընդամենը մի քանի հարյուր սիրիացի փախստական, ապա կարելի է փաստել, որ ընդամենը մի քանի օրվա ընթացքում նրանց թիվը տասնապատկվել է։