Մարտի 2-ին պաշտոնական այցով Հայաստան է ժամանել Վրաստանի վարչապետ Գեորգի Կվիրիկաշվիլիի գլխավորած պատվիրակությունը։ Նույն օրը նրան ընդունել է Հայաստանի նախագահ Սերժ Սարգսյանը: ՀՀ կառավարությունում կայացած բանակցություններից հետո Հայաստանի վարչապետ Կարեն Կարապետյանը և Վրաստանի վարչապետ Գեորգի Կվիրիկաշվիլին հանդես են եկել արդյունքներն ամփոփող հայտարարություններով: Երկու հանդիպումներն էլ, բնականաբար, անցել են շատ ջերմ մթնոլորտում: Հայաստանի վարչապետը հայտարարել է, որ հայ-վրացական հարաբերությունները շարունակում են զարգանալ փոխվստահության մթնոլորտում, և այս հանդիպումն էլ անցել է շատ ջերմ և կառուցողական մթոնոլորտում: Նախագահ Սարգսյանը վստահություն է հայտնել, որ շնորհիվ նաև այս հանդիպումների, ավելանում է երկկողմ առևտրաշրջանառությունը, ամրապնդվում է համագործակցությունը տնտեսության, մշակույթի և մյուս բոլոր ոլորտներում:
«Արդյունքներն ակնառու են և չափելի, ու դա շատ կարևոր է: Վստահ եմ, որ Ձեր այցը ևս իր ներդրումն է ունենալու մեր երկրների միջև փոխգործակցությունը որակապես նոր և ավելի բարձր մակարդակի հասցնելու, երկկողմ հարաբերություններն ամրապնդելու գործում»,- ասել է նա:
Վրաստանի վարչապետը նույնպիսի գոհունակությամբ է արձանագրել, որ 2017 թվականը նշանավորվել է հայ-վրացական փոխադարձ բարձր մակարդակի այցերով: Հայաստանի նախագահի, մինչ այդ վարչապետի այցերը, իսկ այժմ իր պատասխան այցը Հայաստան, Գեորգի Կվիրիկաշվիլիի համոզմամբ, վկայում են կայուն զարգացման դինամիկա ունեցող հայ-վրացական հարաբերությունների մասին:
Գեորգի Կվիրիկաշվիլիի այս այցելությունը պիտի տեղի ունենար դեռևս նախորդ տարվա դեկտեմբերին, սակայն հետաձգվեց այն պատճառով, որ դեռևս չէր հաստատվել վրացական կառավարության նոր կազմը:
Փորձագետները բարձր են գնահատում այցի նշանակությունը: Վրացագետ Ջոնի Մելիքյանը ասում է, որ այս մակարդակի այցելություն Հայաստան վաղուց չէր եղել Վրաստանի վարչապետի կողմից:
«Իմ կարծիքով՝ նպատակն այն էր, որ կողմերը փորձեն միասին ինչ-որ գնահատական տալ երկկողմ հարաբերություններին: Շատ կարևոր էր, որ Վրաստանի պատվիրակության կազմում էին ներառված կարևորագույն նախարարությունները՝ նախարարների մակարդակով: Սա տալիս է հնարավորություն այսպիսի հանդիպումներից հետո պահպանել հորիզոնական կապերը տարբեր նախարարությունների միջև»,- «Առաջին լրատվական»-ի հետ զրույցում նշեց Ջոնի Մելիքյանը:
Բանակցությունների ընթացքում քննարկված առաջնային հարցերից մեկը վերաբերում էր առևտրատնտեսական հարաբերություններին: Անդրադարձ է եղել նաև հումանիտար ոլորտին, և ոչ պակաս կարևոր է նաև այն, որ կողմերը քննարկել են տարածաշրջանային կայունության ու անվտանգության խնդիրները:
«Հայաստանի նախագահի կողմից հատուկ շեշտվեց այն, որ շատ կարևոր է կայունությունը՝ որպես մեր երկրների տնտեսական զարգացման գործոն»:
Ջոնի Մելիքյանի խոսքերով՝ Վրաստանի վարչապետի այցի կարևոր արդյունքներից մեկը հայ-վրացական առևտրատնտեսական հանձնաժողովի նիստ գումարելու մասին պայմանավորվածությունն էր: Կողմերը պայմանավորվել են, որ երկու աշխատանքային խմբերը կպատրաստվեն հայ-վրացական առևտրատնտեսական միջկառավարական հանձնաժողովի նիստին, որը վերջին տարիներին կտրվածքով, փաստորեն, տեղի է ունենալու առաջին անգամ:
Վրացագետ Ալիկ Էրոյանցը «Առաջին լրատվական»-ի հետ զրույցում նշեց հետևյալը. «Նախ, այցը պետք է դիտարկենք վրացական պատվիրակության կազմի առումով: Բավական լուրջ կազմ էր՝ վարչապետի գլխավորությամբ: Ներկա էին տնտեսական բլոկի պատասխանատուները, պաշտպանության նախարարը, և պետք է ենթադրենք, որ քննարկումների առարկա են եղել ոչ միայն ավանդական քաղաքական, տնտեսական ուղղության հարցեր, այլև ենթադրելի է, որ ռազմական ոլորտին առնչվող հարցեր են քննարկվել: Այս առումով, իհարկե, այցը շատ կարևոր է: Պետք է հաշվի առնենք, որ մեր տարածաշրջանում կան հակամարտություններ, և բնական է, որ նմանատիպ այցերի ընթացքում այդ հակամարտություններին են անդրադառնում, և կողմերն իրենց դիրքորոշումներն են հստակեցնում, որը ևս կարևոր է:
Եթե անդրադառնանք քաղաքական մասին, այցը կարևոր է նաև այն հանգամանքով, որ Վրաստանի վարչապետը Հայաստան է այցելում նոր կազմի հաստատումից հետո: Նախորդ տարվա դեկտեմբերին հետաձգվել էր այցը, քանի որ դեռևս չէր հաստատվել նոր կառավարության կազմը: Եվ սա ևս կարևոր է, որ Վրաստանի վերընտրված վարչապետը այցելում է Հայաստան և նախորդ հանդիպումների ընթացքում հնչեցված հայտարարություններով վերահաստատում բովանդակությունը առ այն, որ Վրաստանը ամեն կերպ ձգտում է հարևանների հետ հարաբերությունները պահել հավասարակշռված, լավ հարաբերություններ ունենալ հատկապես այս դեպքում Հայաստանի հետ: Եթե համեմատենք այցերի հաճախակիությունը, կարող ենք արձանագրել, որ հայ-վրացական փոխայցելություններն ավելի հաճախակի են դարձել: Իհարկե, ցանկալի կլիներ, որ ավելի առարկայական արդյունքներ արձանագրեինք այս այցերից հետո, բայց կարծում եմ՝ կլինեն նման արդյունքներ»:
Փորձագետն այս համատեքստում անդրադարձավ նաև էներգետիկ ոլորտում երկու երկրների համագործակցությանը երկկողմ և բազմակողմ ձևաչափերով. «Բավական լուրջ համագործակցություն է ձևավորվել նաև ընդհանուր տարածաշրջանում: Կողմերը փորձում են զարգացնել Ռուսաստան-Վրաստան-Հայաստան-Իրան էներգետիկ, և կարծում եմ՝ լուրջ հաջողություններ են գրանցելու»:
Առաջընթաց է գրանցվել նաև առևտրատնտեսական հարաբերություններում. «Առևտրաշրջանառության առումով կողմերը բավական լուրջ առաջընթաց են գրանցել: 2016 թ. առևտրաշրջանառությունը կազմում էր 367 միլիոն ԱՄՆ դոլար, իսկ 2017 թ. շրջանառությունը հասել է 480 և ավելի միլիոն դոլարի: Այսինքն՝ մոտ 30 տոկոս աճ է գրանցվել, ինչը շատ կարևոր է, քանի որ սա ազդեցություն է ունենում ոչ միայն առևտրատնտեսական հարաբերությունների, այլև տարբեր ուղղությունների վրա»: