Հանրապետության նախագահի փակ, գաղտնի քվեարկության արդյունքներն ամփոփված են: Ըստ այդմ՝ 105 պատգամավորներից քվեարկությանը մասնակցել է 101-ը, անվավեր է ճանաչվել 1 քվեաթերթիկ, 90 պատգամավոր կողմ է քվեարկել, իսկ 10-ը՝ դեմ: Արմեն Սարգսյանն ընտրվել է հանրապետության չորրորդ նախագահ` այսպես կոչված, «ընդարձակ մեծամասնությամբ»: Սակայն կանխատեսելի այս քվեարկության արդյունքներն ինտրիգային են: Բանն այն է, որ Արմեն Սարգսյանի թեկնածությունը պաշտպանող երեք խմբակցությունների պատգամավորների ընդհանուր թվաքանակը 96-ն է և, եթե նույնիսկ «Ելք» խմբակցությունն ամբողջ կազմով մասնակցեր քվեարկությանը, դեմ ձայները չէին կարող գերազանցել 9-ը: Սակայն` բացակա լինելու պատճառով, «Ելքի» երեք պատգամավորներ` Էդմոն Մարուքյանը, Սասուն Միքայելյանը և Գևորգ Գորգիսյանը, նախագահի ընտրություններին չեն մասնակցել: Ստացվում է հետաքրքիր ու ինտրիգային պատկեր. փաստորեն խորհրդարանական պաշտոնական մեծամասնության չորս անդամ հանդգնել են հակադրվել Սերժ Սարգսյանի ցուցումին, կամ էլ` «Ծառուկյան» խմբակցության չորս պատգամավոր է «դավաճանել» իր առաջնորդին: Իհարկե, չի բացառվում նաև, որ «դավաճաններ» կան Արմեն Սարգսյանի թեկնածությունը պաշտպանած ոչ թե մեկ, այլ ասենք` երկու կամ երեք խմբակցություններում:
Հիմա պատկերացնել կարելի է, թե «վհուկների» ինչպիսի «որս» է սկսվելու ՀՀԿ, ՀՅԴ և «Ծառուկյան» խմբակցություններում: Հարցը գուցե նման սրությամբ չդրվեր, եթե առջևում չլինեին վարչապետի ընտրություններ:
Սերժ Սարգսյանը չի կարող հանդուրժել, որ «ընդարձակ մեծամասնությունը» նման «ճաքեր» տա իր ընտրությունների ժամանակ, մանավանդ, որ վարչապետի նշանակման պարագայում ինտրիգն ու քաղաքական լարվածությունն ավելի մեծ են լինելու, իսկ պատգամավորները տեսականորեն կարող են գտնվել «տաք» փողոցի ճնշման տակ: Այսօրվա քվեարկության արդյունքներն ուշագրավ են նաև այլ տեսանկյունից:
Նույնիսկ այն պարագայում, երբ ընդդիմության ճնշումը գրեթե զրոյական է ու բացակայում է հասարակության դիմադրությունը, խորհրդարանական ֆորմալ կամ իրական մեծամասնությունը ճեղքեր է տալիս:
Պատկերացնել կարելի է, թե ինչպիսի «առնետավազք» տեղի կունենա այս խորհրդարանում, եթե երկրում իսկապես լինի ֆորս-մաժորային կամ հեղափոխական վիճակ: Սերժ Սարգսյանի իշխանությունն ուժեղ և կայուն է միայն արտաքուստ, համակարգն իրականում լատենտ ճգնաժամի ռեժիմում է, ինչի վկայությունն են այսօրվա քվեարկության արդյունքները:
