Թուրքական Radikal թերթի փոխանցմամբ՝ հունիսի 12-ի ընտրությունների արդյունքներով, միայն 4 կուսակցության է հաջողվել մուտք գործել թուրքական խորհրդարան։
Խոսքը գնում է վարչապետ Էրդողանի գլխավորած «Արդարություն և զարգացում» կուսակցության (ԱԶԿ), հիմնական ընդդիմադիր, քեմալական ուղղությունը ներկայացնող Ժողովրդա-հանրապետական կուսակցության (ԺՀԿ) և «Ազգայնական շարժում» կուսակցության (ԱՇԿ) մասին։
Սրանց պետք է հավելել քրդական «Խաղաղություն ու ժողովրդավարություն» կուսակցությունը (ԽԺԿ), որն ընտրություններին ներկայացված էր անկախ թեկնածուների տեսքով (խորհրդարանական խմբակցություն ձևավորելու հեռանկարով), քանի որ ի վիճակի չէր հաղթահարել նախընտրական 10 տոկոսանոց արգելքը։
Ոչ վերջնական տվյալներով՝ այս ընտրություններում ԱԶԿ օգտին քվեարկել է 21,442,206 մարդ (49.90 տոկոս), ինչի արդյունքում ԱԶԿ-ն 550 հոգանոց մեջլիսում ստացել է 326 մանդատ։
2002 թվականի նոյեմբերի 3-ի ընտրություններում ԱԶԿ ցուցանիշները համապատասխանաբար կազմել են 10,808,229 քվե, 34.28 տոկոս և 363 մանդատ, իսկ 2007 թվականի հուլիսի 22-ի վաղաժամ ընտրություններում՝ 16,327,291 քվե, 46.58 տոկոս, 341 մանդատ։ Փաստորեն, այս ընտրությունների արդյունքներով ԱԶԿ-ն կորցրեց միանգամից 15 մանդատ։
Այս անգամ ԺՀԿ-ն ստացել է 11,134,616 քվե (25.91 տոկոս) և 135 մանդատ։ 2002-ին ԺՀԿ ցուցանիշներն են 6,113,352 քվե, 19.38 տոկոս և 178 մանդատ, իսկ 2007-ին՝ 7,317,808 մարդ, 20.87 տոկոս, 112 մանդատ։ Փաստորեն, այս ընտրությունների արդյունքներով ԺՀԿ-ն իր մանդատների քանակն ավելացրեց 23-ով։
ԱՇԿ-ն այս անգամ հավաքել է 5,580,580 քվե (12.99 տոկոս) և ստացել 53 մանդատ։ 2002-ի ընտրություններում ԱՇԿ-ին չէր հաջողվել հաղթահարել նախընտրական 10 տոկոսանոց շեմը (8.35 տոկոս, 2,635,787 քվե), իսկ 2007-ի ցուցանիշները հետևյալն են. 5,001,869 քվե, 14.27 տոկոս և 71 մանդատ։ Փաստորեն, այս ընտրությունների արդյունքներով ԱՇԿ-ն կորցրեց միանգամից 18 մանդատ։
Ինչ վերաբերում է քուրդ անկախ թեկնածուներին, ապա նրանք հավաքել են 2,859,267 քվե (6.65 տոկոս) և ստացել 36 մանդատ։ 2002-ին քրդերը հանդես եկան միացյալ կուսակցությամբ (Դեմոկրատական ժողովուրդ կուսակցություն), սակայն պարտություն կրեցին՝ ստանալով քվեների 6.21 տոկոսը (1,960,660 քվե)։ 2007-ին քրդերը հանդես եկան անկախ թեկնածուներով և խորհրդարանում ստացան 21 մանդատ (անկախ թեկնածուների 26 մանդատից)՝ ձևավորելով «Դեմոկրատական հասարակարգ» խմբակցությունը։
Այս ընտրություններում հաղթանակ տարած բոլոր անկախ թեկնածուները ներկայացնում են ԽԺԿ-ն։ Այսինքն՝ քրդերն այս անգամ խորհրդարանում ներկայացված կլինեն 15 մանդատով ավելի (ընդհանուր 36 մանդատ)։