Ադրբեջանական Salam News գործակալությանը տված հարցազրույցի ժամանակ ադրբեջանցի ռազմական փորձագետ Ուզեիր Ջաֆարովն անդրադարձ է կատարել Ռուսաստանի կողմից վարձակալված Գաբալայի ռադիոտեղորոշիչ կայանի (ՌՏԿ) խնդիրներին.
«Արաբական երկրներում տեղի ունեցած զարգացումներն ավելացրին Գաբալայի ՌՏԿ-ի նշանակությունը։ Իրաքում, Աֆղանստանում և արաբական երկրներում ՆԱՏՕ-ի կողմից ավիացիոն ուժերի գործածման պատճառով Գաբալայի ՌՏԿ-ն սկսել է աշխատել ուժեղացված ռեժիմով։
Դա բացասականորեն է ազդում ՌՏԿ-ին հարակից շրջաններում ապրողների առողջական վիճակի վրա։ Արդյունքում ծնվում են ֆիզիկական արատներով երեխաներ։ Վերջին շրջանում Գաբալայում ու մոտակա տարածքներում ծնվել են 2 գլուխ, 12 մատ և այլ ֆիզիկական արատներ ունեցող երեխաներ։ Դրա հիմնական պատճառը Գաբալայի ՌՏԿ-ի արձակած ճառագայթումն է։
Գաբալայի ՌՏԿ-ն ավելի շատ վնասում է Ադրբեջանին, քան օգնում։ Այն սպառնում է տարածաշրջանի բնակչությանն ու շրջակա միջավայրին։ Այժմ Ադրբեջանն ու Ռուսաստանը բանակցում են Գաբալայի ՌՏԿ-ի պայմանագրի երկարաձգման մասին։ Ռուսաստանը համաձայնել է ավելացնել տարեկան վարձավճարը։ Այն պետք է ավելանա նվազագույնը 4 անգամ։
Գաբալայի ՌՏԿ-ն ավելի շատ օգտակար է Ռուսաստանի համար։ Ադրբեջանում շատ չեն այնպիսի փորձագետներն ու կադրերը, որոնք կարող են աշխատել Գաբալայի ՌՏԿ-ում։ Մյուս կողմից էլ այդ ՌՏԿ-ն այնքան էլ կարևոր չէ Ադրբեջանի համար։ Ամենայն հավանականությամբ, հետագայում Ադրբեջանը կձգտի փակել այն։ Սակայն առաջիկա 10-15 տարում դա անհնար է»։
Հիշեցնենք, որ «Դարյալ» տիպի Գաբալայի ՌՏԿ-ն շահագործման է հանձնվել 1985 թվականին: 2002 թվականին Ադրբեջանն այն վարձակալությամբ հանձնել է Ռուսաստանին, որը դրա դիմաց տարեկան 7 միլիոն դոլար է վճարում նրան: Գաբալայի ՌՏԿ-ի հեռահարությունը կազմում է 6000-6500 կիլոմետր:
Այսինքն՝ նրա տեսադաշտում են գտնվում Իրանը, Թուրքիան, Հնդկաստանը, Մերձավոր Արևելքը, ինչպես նաև Հնդկական օվկիանոսն ու Ավստրալիայի մի մասը: Գաբալայի ՌՏԿ-ի վարձակալության ժամկետն ավարտվում է 2012 թվականի օգոստոսին։
Ներկայիս դրությամբ Գաբալայի ՌՏԿ-ում աշխատում է 1400 ռուս զինծառայող։