Վրաստանի տարածքն օկուպացրած Ռուսաստանը թշնամի է, իսկ Թուրքիան՝ գլխավոր դաշնակից։ Այդ մասին Թբիլիսիում խորհրդարանում ելույթի ընթացքում հայտարարել է Վրաստանի հետախուզական ծառայության ղեկավար Դավիթ Սուջաշվիլին. «Մենք շատ երկրների հետ ունենք սերտ հարաբերություններ, այդ տեսանկյունից ես կառանձնացնեի ԱՄՆ-ը»,- հայտարարել է Սուջաշվիլին:
«Առաջին լրատվական»-ի հետ զրույցում վրացի քաղաքագետ Գելա Վասաձեն ընդգծեց՝ Վրաստանի հետախուզական ծառայության ղեկավար Դավիթ Սուջաշվիլիի խոսքերը մի փոքր աղավաղվել են. «Նա ասել է, որ Թուրքիան ոչ թե դարձել է Վրաստանի գլխավոր դաշնակիցը, այլ հանդիսանում է այդպիսին։ Միևնույն ժամանակ, նա մի քանի անգամ շեշտել է, որ Վրաստանի գլխավոր գործընկերը Միացյալ Նահանգներն են, հետախուզությունն էլ առաջին հերթին համագործակցում է ԱՄՆ-ի, հետո նոր մյուս պետությունների հետ։ Եվ ինֆորմացիան, թե Թուրքիան հանդիսանում է Վրաստանի ամենագլխավոր գործընկերը, իրականությանը չի համապատասխանում։ Իրականում հայտարարվել է՝ այո՛, Թուրքիան Վրաստանի դաշնակիցն է, և դա բնական է, որովհետև մենք տարածաշրջանային մի շարք նախագծերում ընդհանուր շահեր ու հետաքրքրություններ ունենք»,- ասաց Վասաձեն։
Մեր այն դիտարկմանը՝ արդյոք վրաց-թուրքական հարաբերությունները կարող են լինել ի հաշիվ հայ-վրացական հարաբերությունների, Վասաձեն պատասխանեց. «Ես չեմ պատկերացնում, որ վրաց-թուրքական հարաբերությունները կառուցվեն՝ հայացք գցելով, թե ինչ հարաբերություններ ունի Հայաստանն այլ պետությունների հետ, օրինակ, այն պետությունների, որոնց հետ այդ հարաբերությունները թշնամական են։ Այլապես մենք պետք է հարաբերություններ հաստատեինք կամ Հայաստանի, կամ մյուս այլ պետությունների հետ, որոնց հետ Հայաստանը թշնամական վերաբերմունք ունի»։
Շարունակելով իր միտքը, Գելա Վասաձեն ընդգծեց. «Հայաստանն իր օրակարգն ունի, Վրաստանն՝ իր։ Այլ հարց է, որ տարածաշրջանային անվտանգության տեսանկյունից ցանկալի կլիներ, որ Հայաստանը չունենար այն խնդիրները, որ կան Թուրքիայի ու Ադրբեջանի հետ։ Բայց դա ընդամենը բարի մաղթանք է»։
