Грузия Online-ի փոխանցմամբ՝ Վրաստանի փոխարտգործնախարար Նինո Կալանդաձեն ավանդաբար երկուշաբթի օրը ճեպազրույց է տվել լրագրողներին, որի ժամանակ անդրադարձել է Ռուսաստանի և ՆԱՏՕ-ի հետ Վրաստանի հարաբերություններին.
«Վրաստանը չի փոխել Առևտրի համաշխարհային կազմակերպությանը (ԱՀԿ) Ռուսաստանի անդամակցության վերաբերյալ իր դիրքորոշումը։ Ռուս-վրացական տնտեսական սահմանների թափանցիկության պահանջը մնում է ուժի մեջ։
Նախագահ Սաակաշվիլին ԱՄՆ փոխնախագահ Ջոզեֆ Բայդենի հետ չի պայմանավորվել առանց նախապայմանների ԱՀԿ-ին Ռուսաստանի աջակցության մասին։ Բայդենի հետ հանդիպման ժամանակ քննարկվել է այդ խնդիրը, սակայն վրացական կողմի պահանջները չեն փոխվել, մնացել են ուժի մեջ, և դա գիտակցում են թե՛ ԱՄՆ-ը, թե՛ մյուս բոլոր գործընկերները։
Վրաստանը չի կորցրել ՆԱՏՕ-ին ինտեգրվելու հետաքրքրությունը և շարունակում է կատարել ստանձնած պարտավորությունները։ ՆԱՏՕ-ին անդամակցելու Վրաստանի ցանկությունը նախկինի նման մնում է ուժի մեջ։ ՆԱՏՕ-ն շարունակում է մնալ առաջատար կազմակերպություն, որը կարող է անվտանգության երաշխիքներ տրամադրել»։
Կալանդաձեն իր և ոչ թե ԱԳՆ-ի անունից սեփական համերկրացիներին կոչ է արել չայցելել Ռուսաստան, քանի որ դա անվտանգ չէ. «Այս նախազգուշացումը հենված է կոնկրետ փաստերի վրա, որոնք հաստատում են, որ Ռուսաստանում էթնիկ վրացիներին սպառնում է իրական վտանգ։ Ռուսաստանում հակավրացական կամպանիան սկսվել է մինչև 2008 թվականը, այն իրականացվում է ոչ միայն Ռուսաստանի շարքային քաղաքացիների, այլև՝ իշխանությունների կողմից»։
Հիշեցնենք, որ ԱՀԿ-ին Ռուսաստանի անդամակցության շուրջ ռուս-վրացական բանակցությունների հերթական փուլը Ժնևում կայանալու է հունիսի վերջին։
