Թուրքական Star թերթի փոխանցմամբ՝ «Էրգենեկոն» ահաբեկչական կազմակերպության և «Բալյոզ» ռազմական հեղաշրջման շրջանակներում որպես մեղադրյալներ անցնող 5 մարդ երեկ կայացած ընտրությունների արդյունքներով անցել են թուրքական խորհրդարան։
Գլխավոր ընդդիմադիր ուժի՝ Ժողովրդա-հանրապետական կուսակցության (ԺՀԿ) ցանկից խորհրդարան են անցել 4-ը, որոնք բոլորն էլ ներառված են «Էրգենեկոն»-ի գործում. Cumhuriyet թերթի խմբագրական խորհրդի անդամ Մուսթաֆա Բալբայն ընտրվել է Իզմիրի 2-րդ ընտրատարածքից, բժշկագիտության պրոֆեսոր Մեհմեդ Հաբերալը՝ Զոնգուլդակի 1-ին ընտրատարածքից, Էրզինջանի նախկին գլխավոր դատախազ Իլհան Ջիհաները՝ Դենիզլիի 2-րդ ընտրատարածքից, թուրք գործարար, Անկարայի առևտրի կենտրոնի գործադիր կոմիտեի նախագահ Սինան Այգունը՝ Անկարայի 2-րդ ընտրատարածքից։
Իսկ «Ազգայնական շարժում» կուսակցությունից (ԱՇԿ) ընտրվել է «Բալյոզ»-ի գործով մեղադրյալ, պաշտոնաթող գեներալ-լեյտենանտ Էնգին Ալան՝ Ստամբուլի 1-ին ընտրատարածքից։
Միևնույն ժամանակ, մի շարք «էրգենեկոնականներ» (թուրք լրագրող, գրող, հաղորդավար ու քաղաքական գործիչ Թունջայ Օզքանը, «Աշխատավորական» կուսակցության առաջնորդ, հայտնի հայատյաց Դողու Փերինչեքը) և «բալյոզականներ» (Ստամբուլում տեղակայված 1-ին դաշտային բանակի նախկին հրամանատար, գեներալ Չեթին Դողանը) ձախողվել են երեկվա ընտրություններում։
