Ամերիկյան հեղինակավոր The New York Times թերթում հրապարակվել է Էլեն Բերիի «Ադրբեջանն ու Հայաստանը հանդիպում են տարածքային վեճին վերջ դնելու համար» խորագրով հոդվածը, որում ասվում է.
«Շաբաթ օրn Ադրբեջանի, Հայաստանի և Ռուսաստանի արտգործնախարարները դռնփակ հանդիպում ունեցան Մոսկվայում, քանի որ միջազգային միջնորդներն ուժեղացրել են իրենց ճնշումները ղարաբաղյան հակամարտության կարգավորման հարցում բեկում մտցնելու համար։
Փորձագետները կարծում են, որ հունիսի 25-ին Կազանում կայանալիք երեք երկրների նախագահների հանդիպումը լինելու է վերջին տարիների լավագույն հնարավորությունը տարածքային վեճին վերջ դնելու համար։ Այս գործընթացում մեծ ներդրում ունի Ռուսաստանի նախագահ Դմիտրի Մեդվեդևը, որը նոր ազդակ է հաղորդել դրան։
Ռուսաստանի ԱԳՆ պաշտոնական ներկայացուցիչ Ալեքսանդր Լուկաշևիչը հայտարարել է, որ Կազանում Ռուսաստանը փորձելու է կողմերին համոզել հիմնարար սկզբունքների հարցում համաձայնության գալու շուրջը, ինչն արդեն ձգձգվում է ավելի քան 5 տարի։
Երեք երկրների արտգործնախարարները շաբաթօրյա հանդիպումից հետո հայտարարություն չարեցին, սակայն ուրբաթ օրն Ադրբեջանի նախագահը հայտարարեց, որ մեծ ակնկալիքներ ունի կազանյան հանդիպումից։ Հայկական կողմի հայտարարություններն ավելի զգուշավոր էին, թեև հինգշաբթի օրը Հայաստանի արտգործնախարարը հայտարարեց, որ հնարավոր է՝ գործընթացում առաջընթաց գրանցվի, եթե Ադրբեջանը նույնպես տա իր համաձայնությունը։
Կարնեգիի հիմնադրամի Կովկասի գծով փորձագետ Թոմաս դե Վաալը հայտարարեց, որ Լեռնային Ղարաբաղի շուրջ կրքերն այն աստիճան են շիկացել, որ Ադրբեջանի և Հայաստանի նախագահների համար լուրջ ռիսկային գործոններ են ստեղծվել։ Շրջանակային համաձայնագիրն իր մեջ ընդգրկում է նաև այն հիմնարար սկզբունքները, որոնցով հնարավոր է դառնում հազարավոր ադրբեջանցի փախստականների վերադարձը։
Հայաստանի նախագահը պետք է իր ժողովրդին համոզի, որ այնտեղ բնակվող էթնիկ հայերին վտանգ չի սպառնա, քանի որ Ղարաբաղը ստանալու է ինքնավարության միջանկյալ կարգավիճակ։ Իսկ Ադրբեջանի նախագահը պետք է ցուցադրի, որ վտանգի տակ չի դնում երկրի տարածքային ամբողջականությունը»։