«ԱրմենՏել» ընկերությունը (ապրանքանիշը Beeline) և Հայաստանի Կիբերսպորտի ազգային պրոֆեսիոնալ լիգան հայտարարում են Հայաստանի Կիբերխաղերի 5-րդ բաց առաջնության մեկնարկի մասին: Առաջնությունը միաժամանակ հանդիսանում է միջազգային համակարգչային վիդեո խաղերի (WorldCyberGames – WCG) ամենամեծ փառատոնի Հայաստանյան նախընտրական փուլ: Միջազգային համակարգչային խաղեր մրցույթն իր պատմությունը սկսել է 2000թ-ին:
Համաձայն առաջնության կանոնների` միջազգային առաջնության մասնակցության հայտ ներկայացրած յուրաքանչյուր երկիր անց է կացնում նախընտրական փուլ: Հայաստանյան նախընտրական փուլը կկայանա 2011թ-ի հունիսի 22-26-ը «Կոնգրես» հյուրանոցի շքասրահում:
Այս տարի պաշտոնական մարզաձևեր են ընտրված FIFA 2011-ը և StarCraft 2-ը, իսկ ոչ պաշտոնական` Counter-Strike 1.6-ը և WarCraft 3 Dota-ն: Պաշտոնական մարզաձևերում հաղթողներն այս տարի հնարավորություն կունենան մասնակցելու WCG Գլխավոր եզրափակչին, որը տեղի կունենա 2011թ-ի դեկտեմբերի 8-11-ը Կորեաի Բուսան քաղաքում: Հայաստանյան առաջնության ընդհանուր մրցանակային ֆոնդը կազմում է 3,600,000 դրամ և կբաշխվի բոլոր չորս մարզաձևերում առաջին երեք տեղերը գրաված մասնակիցների միջև: «ԱրմենՏել» ընկերությունը նաև կապահովի WCG Հայաստան 2011 խաղերի օնլայն ինտերնետ հեռարձակումը:
«ԱրմենՏել» ընկերության Գլխավոր տնօրեն Իգոր Կլիմկոյի խոսքերով` «Միջազգային Կիբերխաղերը խոշորագույն խաղային առաջնություն է ամբողջ աշխարհում` այնպիսին, ինչպիսին Օլիմպիական խաղերն են մարզիկների համար: «ԱրմենՏել» ընկերությունն ուրախ է աջակցելու հայ երիտասարդներին. թող թիմային ոգին, հաջողությունը և հավատը պայծառ ապագայի և հաղթանակի հանդեպ ուղեկցեն մեր կիբեր մարզիկներին»:
Հայաստանի Կիբերսպորտի ազգային պրոֆեսիոնալ լիգայի կազմակերպչական խումբը տեղեկացնում է, որ այս տարի միջոցառումներն ավելի մասշտաբային են. բացի հիմնական խաղերից, կազմակերպված են նաև հարակից մրցույթներ` «Սիրողական նկարիչ», «Սիրողական լուսանկարիչ», «Թաչ-թայփինգ (միայն կանանց – աղջիների համար)»:
Հայաստանյան մրցույթի մասնակիցների գրանցումը կատարվում է առցանց` մրցումների պաշտոնական www.wcg.am կայքում, որտեղ նաև տեղադրված է մանրամասն տեղեկատվություն մրցումների և մրցույթի մասին: Համաշխարհային առաջնության հովանավորն է «Սամսունգ» ընկերությունը, ազգային առաջնության գլխավոր հովանավորն է «ԱրմենՏել» ընկերությունը: Համակարգչային աջակցությունը` «Ֆայն» ընկերության, իսկ ինֆորմացիոն հովանավորներն են RadioVan-ը և Russkoe Radio-ն: