Շախմատի միջազգային ֆեդերացիայի նախագահ Կիրսան Իլյումժինովը կիրակի օրը Տրիպոլիում հանդիպել է Մուամար Քադաֆիի հետ։ Խաղացված շախմատային պարտիայի ընթացքում երկրի առաջնորդը հայտարարել է, որ չի պատրաստվում լքել Լիբիան և վայր դնել իր լիազորությունները:
«Հանդիպումը տևել է մոտավորապես երկու ժամ, մենք շախմատ խաղացինք: Հանդիպումը կայացավ ոչ թե ինչ-որ բունկերում, այլ Լիբիայի մայրաքաղաքի կառավարական շենքերից մեկում»,- «Интерфакс»-ի հետ հեռախոսազրույցում հայտարարել է Իլյումժինովը:
Քադաֆին հայտարարել է, որ չի պատրաստվում լքել Լիբիան, քանի որ սա իր հայրենիքն ու հողն է, որտեղ զոհվել են իր որդիներն ու թոռները: Նա նաև հավելել է, որ չի հասկանում, թե ո՞ր պաշտոնը պետք է լքի:
«Ես ո՛չ վարչապետ եմ, ո՛չ նախագահ և ո՛չ էլ թագավոր: Ես Լիբիայում ոչ մի պաշտոն չեմ զբաղեցնում, այդ իսկ պատճառով ես ոչ մի պաշտոնից չեմ կարող հրաժարվել»,- Քադաֆիի հետ խոսակցությունը փոխանցել է Իլյումժինովը:
«Ես Քադաֆիին իմ ցավակցությունն եմ հայտնել 20-ամյա որդու, երկու թոռնիկների և չորս ամսական թոռնուհու զոհվելու կապակցությամբ: Դրանից հետո ինձ ցույց տվեցին այն տունը, որտեղ այդ ռումբերն էին ընկել, և որտեղ զոհվել էին Քադաֆիի հարազատները»,- ասել է ՖԻԴԵ-ի նախագահը:
Նրա խոսքերով, Տրիպոլիում շատ ավերածություններ կան, այդ թվում՝ նաև քաղաքացիական շինությունների:
Իլյումժինովը հայտարարել է, որ հանդիպումներ է ունեցել նաև Լիբիայի ԱԳ և կրթության նախարարների հետ:
«Հանդիպել եմ նաև Քադաֆիի ավագ որդու՝ Մուհամեդի հետ, որը գլխավորում է Օլիմպիական կոմիտեն: Նրա հետ շախմատ խաղացինք, որի ընթացքում խաղարկեցինք սիցիլիական պաշտպանությունը»,- ասել է Իլյումժինովը:
ՖԻԴԵ-ի նախագահը նշել է, որ պատրաստվում է շարունակել իր շրջագայությունը Աֆրիկայի երկրներով: Նա պատրաստվում է այցելել Թունիս և հանդիպել տեղի իշխանությունների հետ:
