Խաղաղության հիմնախնդիրների ուսումնասիրության Ստոկհոլմի ինստիտուտն իր ամենամյա զեկույցում նշել է, որ շարունակվող սպառազինությունների մրցավազքի պատճառով աշխարհը կանգնած է լրջագույն խնդիրների առջև՝ շեշտելով, որ շատ հակամարտությունների պատճառ են դարձել բնական ռեսուրսները: Այս մասին հաղորդում է Al-Jazeera-ն:
Նշվում է, որ անցյալ տարի աշխարհում սպառազինությունների վրա ծախսվել է մոտ 1.6 տրիլիոն դոլար: ԱՄՆ մասնաբաժինն այդ ծախսերում կազմում է 43%, Չինաստանինը՝ 7%, իսկ Ֆրանսիային, Մեծ Բրիտանիային և Ռուսատսանին բաժին է ընկնում 4-ական տոկոս: Ռազմական ծախսերի աճ է արձանագրվել Աֆրիկայում՝ մոտ 5%, Հարավային Ամերիկայում՝ 6%: Եվրոպական երկրներում այդ ծախսերը նվազել են 3%-ով, իսկ Ասիայում՝ մոտ 1.5%-ով:
Զենքի արտահանման շուկայում առաջատարը կրկին Միացյալ Նահանգներն է, որին բաժին է ընկնում շուկայի մոտ 30%-ը: Այդ երկիրը ռազմական առաքումների պայմանագրեր ունի աշխարհի մոտ 75 երկրի հետ, որի խոշորագույն հաճախորդներն են Հարավային Կորեան, Ավստրալիան և Արաբական Միացյալ Էմիրությունները: Ռուսաստանը, որը հիմնականում զենք է արտահանում Հնդկաստան և Չինաստան, այս շուկայում ունի 23% մասնաբաժին:
Զեկույցում ասվում է, որ ռազմական հակամարտությունների աճի հետ կապված՝ աճել են միջազգային տնտեսության ծախսերը, որոնք կազմել են մոտ 8.2 տրիլիոն դոլար: Նշվում է, որ քննադատության է արժանի կոռուպցիան, որը գոյություն ունի սպառազինությունների շուկայում, քանի որ զենքի վաճառքի շուկայում գործարքների մոտ 40%-ն անօրինական է:
