Քաղաքագետ Հրանտ Մելիք-Շահնազարյանի կարծիքով՝ Ադրբեջանի իշխանությունների առջև խնդիրներ են դրված և դրանք լուծելու համար այդ երկիրը գնում է ժողովրդավարության տեսակետից ոչ պոպուլյար քայլի. «Հասկանալի է, որ ընտրությունների անսպասելի տեղափոխումը, առաջին հերթին, անակնկալ է նրա մրցակիցների համար։ Որքան էլ նրանք թույլ լինեն՝ այդ խնդիրները ստեղծվում են, բնականաբար այդ որոշումը պետք է շատ քննադատվեր միջազգային կառույցների կողմից, ինչը մենք տեսնում ենք»,- «Առաջին լրատվական»-ի հետ զրույցում ասաց Հրանտ Մելիք-Շահնազարյանը, հավելելով՝ այդ խնդիրները, որ ստիպել են Ալիևին գնալ այդ քայլին, շատ ավելի լուրջ են, քան իր իմիջը։
Քաղաքագետն ընդգծում է՝ պաշտոնական Բաքվի բացատրությունները տրամաբանական չեն. «Անգամ անգործունեության խոստովանություն է, ասում են՝ զուգահեռաբար մի քանի կարևոր միջոցառում չենք կարող անցկացնել։ Հարյուրամյակ նշելու համար ընտրության օր են տեղափոխում, բայց այդ 100-ամյակը կարելի էր ընդամենը մշակութային միջոցառումների շարանով և 1-2 քաղաքական ելույթով ամփոփել։ Ես չեմ հավատում այն «փաստարկներին», որ ներկայացնում է ադրբեջանական կողմը։ Պատճառները պետք է փնտրել այլ տեղերում։ Սա ավելի շատ իրենց ներքին տնտեսական, ներքաղաքական զարգացումներով է պայմանավորված»։
Հրանտ Մելիք-Շահնազարյանը նշում է՝ Ադրբեջանում առկա ֆինանսական ճգնաժամը պատճառներից մեկն է. «Դժվար է գնալ ընտրության այն դեպքում, երբ հանրությունը ծանր ֆինանսական վիճակում է։ Որքան էլ Ալիևը հաշվի չնստի հասարակության կարծիքի հետ՝ ինչ-որ կայունություն իրեն պետք է»։
Հարցազրույցն ամբողջությամբ՝ տեսանյութում։