Ղարաբաղյան խնդրի կարգավորման ներկայիս իրավիճակը ազատամարտիկ Վահե Շահմուրադյանը շատ բացասական գնահատեց: Նա նշեց, որ հայաստանյան իշխանությունների ամեն օրվա զիջողական դիրքորոշումը հաղթանակ է ապահովում Ադրբեջանի համար:
«Առաջին լրատվականի» հետ զրույցում նա նշեց, որ Շուշիի ազատագրումից արդեն 19 տարի է անցել, և ոչինչ չէր խանգարում բնակեցնել և բարեկարգել այդ տարածքները, և այսօր Ադրբեջանը ոչ մի իրավունք չէր ներկայացնի Շուշիի և մյուս տարածքների նկատմամբ:
«Այսօր իրավիճակը հասցրել են վերջին ամենադժվարին պահին և մտածում են ինչ անել: Թող մինչև հիմա մտածեին: Սերժիկն ունի 5 մլրդ դոլար, Քոչարյանն ունի 4 մլրդ դոլար, ամբողջ Ղարաբաղն իրենց ձեռքն է, և իրենք կարող են մենակ տնտեսական զարգացում ապահովել Ղարաբաղում»,- մանրամասնեց Շահմուրադյանը:
Նա նկատեց, որ այս իշխանություններն իրենց հույսը դրել են Ռուսաստանի վրա. «Իհարկե, առանց Ռուսաստանի օգնության Ղարաբաղը չեր լինի, բայց առանց Հայաստան էլ չէր լինի: Եթե Երևանը սով, ծանր, մութ օրեր չտեսներ, Ղարաբաղը չէր պահպանվի: Ու այսքանից հետո մեր ժողովուրդը լավ չի ապրում, և պարզ է, որ չպիտի սիրեն իշխանություններին»:
Մեր այն հարցին, թե ինքը հավանական համարո՞ւմ է, որ Ղարաբաղում պատերազմի վերսկսման գործում Ռուսաստանը կմիջամտի հօգուտ Հայաստանի, Շահմուրադյանը պատասխանեց. «Եթե Թուրքիան էլ շարժվի Հայաստանի վրա, Ռուսաստանն էլի չի խառնվի ուղղակի կերպով, բայց անուղղակի, իհարկե, կաջակցի»:
Սակայն, ըստ ազատամարտիկի, պետք չէ նստել և սպասել Ռուսաստանի աջակցությանը, քանզի Հայաստանն ունի բոլոր շանսերը լավ երկիր կառուցելու համար. «Եթե երեք տարի այս երկրում լավ իշխանություններ լինեն, մենք Շվեյցարիայից ոչ պակաս երկիր կունենանք: Բայց այս իշխանությունները չեն ուզում, ինչու ուզեն, երբ պաշտոնով 4 միլիարդ են դիզել` եղած փողը մի գրպանից հանում են, դնում մյուս գրպանը»: