Հայաստանում տեղի ունեցող քաղաքական և քաղաքացիական վերջին գործընթացները տրամաբանության սահմանում են՝ արտառոց որևէ բան չկա: Կան սպասումներ՝ հատկապես ՌԴ նախագահ Վլադիմիր Պուտինի՝ Հայաստան կատարելիք առաջիկա այցի հետ: Այսօր կայացած մամուլի ասուլիսի ժամանակ այս մասին ասաց ՀՀԿ-ական պատգամավոր Մկրտիչ Մինասյանը՝ հավելելով, որ ակնկալիքները առնչվում են հատկապես Մաքսային միությանը Հայաստանի անդամակցության վերաբերյալ Պուտինի հետ կայանալիք քննարկումների հետ:
«Չեմ կարող ասել՝ Պուտինի այցի ընթացքում կբարձրացվի՞ արդյոք Ղարաբաղի հարցը, սակայն կարծում եմ, որ տրամաբանորեն այդ հարցը հնարավոր չի լինի շրջանցել: Վստահ եմ, որ հանդիպման ժամանակ մեզ հուզող բոլոր հարցերը կքննարկվեն ստրատեգիական գործընկեր հանդիսացող երկրի նախագահի հետ: Վստահաբար ասում եմ, որ ՄՄ-ին անդամակցելու հարցում Հայաստանը Բելառուսի հետ որևէ խնդիր չունի: Ամենայն հավանականությամբ, ՄՄ-ին կանդամակցի նաև Ուկրաինան, իսկ Եվրոպան կհասկանա, որ ճնշումների գնով ոչնչի հասնել չի կարելի, և որ իրենից բացի՝ կա արևելյան երկրների միություն»,- ասաց Մկրտիչ Մինասյանը:
Անդրադառնալով Արարատում տեղի ունեցած ընտրություններին՝ Մկրտիչ Մինասյանը նշեց, որ հայ հասարակությունը չի սովորել ընտրություններում հաղթողին ընկալել միանգամից, իսկ պարտված քաղաքական գործիչը՝ սեղմել հաղթած թեկնածուի ձեռքը: «Պարտվողը պիտի հասկանա, որ ընտրություններում չհաղթելը դեռ վերջ չէ, և որ ինքը կարող է վաղն ավելի լավ աշխատել»,- ասաց պատգամավորը:
Հիշեցնենք, որ Արարատ քաղաքում նոյեմբերի 10-ին կայացած քաղաքապետի արտահերթ ընտրություններում հաղթել է ՀՀԿ թեկնածու Հայկ Հայկյանը:
ԿԸՀ-ի նախնական արդյունքների համաձայն` Հայկ Հայկյանը ստացել է 4544 քվե, իսկ նրա մրցակիցը՝ ԲՀԿ-ական Սամվել Բարսեղյանը, 4214 քվե:
Պաշտոնական տվյալներով՝ ընտրություններին մասնակցել է 8921 ընտրող՝ գրանցված 13 հազար 218-ից: Անվավեր քվեաթերթիկների թիվը 160 է:
Նշավան համայնքում ՀՀԿ-ական Պապ Հակոբյանը ստացել է 427 քվե, իսկ նրա մրցակից, անկուսակցական Մյասնիկ Հովհաննիսյանը՝ 209 քվե:
