Հայաստանի Հանրապետության Ազգային ժողովի հինգերորդ գումարման չորրորդ նստաշրջանի ժամանակավոր հաշվիչ հանձնաժողովը, օրակարգում ունենալով ՀՀ Վերահսկիչ պալատի նախագահի նշանակման քվեարկության անցկացման հարցը, որոշում է վաղը՝ նոյեմբերի 12-ին, 45 րոպե տևողությամբ՝ 12:15-13:00-ն ընկած ժամանակահատվածում, ՀՀ ՎՊ նախագահի նշանակման քվեարկությունն անցկացնել ԱԺ նիստերի դահլիճի հարևանությամբ գտնվող նախասրահում:
Հաշվիչ հանձնաժողովի նախագահ Սուքիաս Ավետիսյանը այսօր ԱԺ նիստում պատգամավորներին հիշեցրեց քվեարկության կարգը: «Նորից հարկ եմ համարում քվեաթերթիկը ներկայացնել և բացատրել. ովքեր դեմ են, «կողմ»-ի վրա են գիծ քաշում, ովքեր կողմ են՝ «դեմ»-ի, և խնդրում եմ ձեր գծիկները, ծիտիկները և խաչիկները դնելիս ուշադիր եղեք, որպեսզի հետո հանձնաժողովին չմեղադրեք»,- ասաց նա:
Ավետիսյանը, դիմելով գործընկերներին, ովքեր «իրար մեջ չեն կարողանում պայմանավորվել» քվեարկության հետ կապված հարցերում՝ խորհուրդ տվեց չփորձել հանիրավի մեղադրել հաշվիչ հանձնաժողովին, իսկ ՀԱԿ պատգամավոր Լևոն Զուրաբյանին առաջարկեց հանձնաժողովի անդամներից ներողություն խնդրել արտահայտած մտքերի համար:
Նշենք, որ Զուրաբյանն անվստահություն էր հայտնել հանձնաժողովի աշխատանքին՝ ելնելով շաբաթներ առաջ Գլխավոր դատախազի թեկնածու Գևորգ Կոստանյանի ընտրության փորձից, և նշել, որ չեն մասնակցելու հանրապետական այս ֆարսին, որպեսզի հետո ընդդիմությանը պախարակելու առիթ չլինի:
