Ադրբեջանի նախագահ Իլհամ Ալիևը հրամանագիր է ստորագրել արտահերթ նախագահական ընտրություն անցկացնելու մասին, որը, ըստ հրամանագրի, տեղի կունենա 2018 թվականի ապրիլի 11-ին: Համաձայնագիրն ուշագրավ է այն իմաստով, որ 2018 թվականին Ադրբեջանում նախատեսված էր նախագահի հերթական ընտրություն՝ հոկտեմբերի 17-ին:
Փորձագետների դիտարկմամբ՝ Ալիևի այս որոշումն ունի ներքաղաքական պատճառներ։ Փորձագետ Ռուբեն Մեհրաբյանն «Առաջին լրատվական»-ի հետ զրույցում նշեց, որ արտաքին խնդիրներ չի տեսնում. «Այստեղ պատճառը ներքին է՝ միջկլանային հարաբերությունները։ Ալիևն այսկերպ իրեն ապահովագրում է, որ մինչև հոկտեմբեր չեն լինի այնպիսի ֆորս-մաժորներ, որոնք կարող են վտանգել իր վերարտադրությունը։ Հետևապես, Ալիևն ուղղակի գնում է դեպքերի ընթացքի արագացմանը, և այդ վերարտադրության հարցերը փորձում է լուծել հնարավորինս շուտ։ Արդյունքում ծնվեց այս որոշումը»,- ասաց Մեհրաբյանը։
Մեր զրուցակիցը չի կարծում, թե այս հարցում պետք է զուգահեռներ փնտրել Հայաստանի հետ՝ այն կոնտեքստում, որ ապրիլին մեզ մոտ սպասվում է լիարժեք անցում խորհրդարանական կառավարման մոդելին և, հնարավոր է՝ վարչապետի պաշտոնը ստանձնի հենց Սերժ Սարգսյանը. «Ես իրար հետ չէի կապի, Հայաստանում գործընթացն արդեն կանխորոշված է, որևէ ինտրիգ չկա, և ընտրություններ, որպես այդպիսին, չեն լինելու։ Հայաստանում տեղի է ունենալու անձի փոփոխություն, արդեն իսկ կայացած ընտրությունների արդյունքի հիման վրա փոխատեղումներ, և սա նույն հարթության վրա դնել Ադրբեջանում նախագահական ընտրությունների հետ պետք չէ»,-ընդգծեց փորձագետը։
Ըստ Մեհրաբյանի՝ անկախ Ադրբեջանում նախագահական ընտրությունների օրվանից, հստակ է, որ ղարաբաղյան հիմնահարցի շուրջ բանակցությունները վարելու են ամենաբարձր մակարդակում՝ անձամբ Իլհամ Ալիևն ու Սերժ Սարգսյանը. «Պարզ է, որ այս գործըթնացներն այդ դասավորության վրա չեն ազդելու, պատճառները ներքաղաքական են։ Ալիևի որոշման պատճառները պայմանավորված են Ադրբեջանի տնտեսության խիստ անբարենպաստ կանխատեսումներով։ Ալիևը չի ուզում, որ իր վերարտադրության պահն ու այդ ճգնաժամը ժամանակային առումով իրար համընկնեն»,- ասաց նա։
Քաղաքագետ Լևոն Շիրինյանը՝ արտահերթ նախագահական ընտրությունների նշանակելու Ալիևի որոշումը ևս պայմանավորում է Ադրբեջանի ներքաղաքական իրադարձություններով։ «Սա իր քաղաքական հակառակորդին ցայտնոտի մեջ դնելու համար է։ Մինչև աշուն պետք է թքեին-մրեին, ինչքան քննադատություն էր լինելու։ Ասում են՝ 90 տոկոս վարկանիշ ունի, բայց հո այդպես չէ՞։ Հիմա այս քայլով պարզապես ցայտնոտի մեջ է դնում ընդդիմությանը, որը մինչև ապրիլ չի հասցնի ինքնակազմակերպվել։ Սա հաղթանակ ապահովելու լավագույն տակտիկա էր»,- ասաց Շիրինյանը։
Քաղաքագետի խոսքերով՝ Ադրբեջանը չկայացած, քայքայված պետություն է. «Թվում է, թե կա պետություն, բայց իրականում չկա։ Ուրիշ բաներ պետք չէ որոնել՝ պարզապես հակառակորդին է անակնկալի բերել։ Մեր հետ նմանություն պետք չէ փնտրել, գուցե երկուսս էլ սովետական ժառանգություն ունենք, բայց մենք այլ քաղաքակրթություն ու մշակույթ ունենք՝ որքան էլ աղճատվել ենք։ Կարող ենք իհարկե մեր իշխանություններին քննադատել, բայց մեր գործընթացների հետ կապ չունի։ Հիմա իր հակառակորդները նույնիսկ իրեն հայհոյելու ժամանակ չեն ունենա, մինչև հայհոյեն՝ ընտրությունները կանցնեն»,- եզրափակեց Լևոն Շիրինյանը։