Թուրքմենստանի իշխանությունները քաղաքացիներին արգելում են երկրից դուրս բերել ցանկացած ոսկի՝ բացի ամուսնական մատանուց: Այս մասին հաղորդում է «Թուրքմենստանի այլընտրանքային լուրեր»-ը:
Աշխաբադի օդանավակայանում սկսել են ուղևորներին մանրազնին խուզարկել և նրանց ստիպում են ազատվել իրենց մոտ եղած բոլոր ոսկյա զարդերից՝ բացառությամբ ամուսնական մատանու:
Հրատարակչության տվյալներով՝ գործազրկության և գումարի բացակայության պատճառով ճարպիկ գործարարները սկսել են բնակիչներից շատ էժան գնով գնել ոսկեղենը և դուրս բերել Թուրքիա, որտեղ մեկ գրամի դիմաց հնարավոր է ստանալ մինչև $23,5: Օրինական ոսկերչական խանութները մարդկանցից ոսկի չեն գնում:
Չնայած պաշտոնական արգելքը տարածվում է միայն առանց բարձր հարգի ոսկեղենի վրա, մաքսատան ծառայողները արգելում են իրենց մոտ ունենալ ցանկացած ոսկյա իր: Հրատարակչությունը հաղորդում է, որ մեծապես տարածվել է կաշառակերությունը՝ որոշակի գումարի դիմաց կարելի է դուրս բերել ցանկացած ծավալի ոսկեղեն:
Արգելքը ծնել է գումար վաստակելու ևս մեկ ձև՝ Թուրքիա թռչող գրանցման սեղանիկների մոտ կանգնում են մարդիկ, ովքեր ուղևորներին առաջարկում են 8-11 դոլար վճարել ոսկյա զարդեր անցկացնելու համար: Սակայն մաքսավորները, իմանալով այդ սխեմայի մասին, հաճախ թռչողներին ստիպում են մերկանալ:
