Վրացական GHN լրատվական գործակալության փոխանցմամբ՝ հայտնի է դարձել Առևտրի համաշխարհային կազմակերպությանը (ԱՀԿ) Ռուսաստանի անդամակցության շուրջ ռուս-վրացական բանակցությունների հերթական փուլի անցկացման ժամկետը։ Դրանք կայանալու են հունիսի վերջին։ Այս մասին հայտարարել է Ռուսաստանի տնտեսական զարգացման նախարարության առևտրային բանակցությունների դեպարտամենտի ղեկավար Մաքսիմ Մեդվեդկովը։
Վերջինս նշել է, որ երկու երկրների միջև նախկինի նման պահպանվում են մի շարք չլուծված հարցեր, սակայն ինքը հուսով է, որ իրենց կհաջողվի կարգավորել դրանք։
Հիշեցնենք, որ օրեր առաջ շվեյցարական կողմի խնդրանքով անորոշ ժամկետով հետաձգվել էր ռուս-վրացական բանակցությունների հերթական փուլը, որը փաստորեն կայանալու է հունիսի վերջին։
Ռուսաստանը ցանկանում է ԱՀԿ-ին անդամակցել դեռևս 1993 թվականից, ինչին Վրաստանն ակտիվորեն խոչընդոտում է: 2008 թվականի օգոստոսին տեղի ունեցած ռուս-վրացական հնգօրյա պատերազմից հետո՝ այս տարվա մարտի 10-ին, Ռուսաստանն ու Վրաստանն առաջին անգամ Շվեյցարիայի Բեռն քաղաքում ԱՀԿ-ին Ռուսաստանի անդամակցության համար նստեցին բանակցությունների սեղանի շուրջ:
Սակայն դա ավարտվեց անարդյունք, քանի որ Ռուսաստանը Վրաստանից պահանջում էր վրացական մաքսային վերահսկողության վերականգնման հարցում բանակցային գործընթաց սկսել ոչ թե իր, այլ Աբխազիայի և Հարավային Օսիայի հետ: