«Կապիտալ»-ը գրում է. «Չեմ ցանկանում որևէ վատ բան ասել Սեֆիլյանի մասին, բայց Սեֆիլյանը չի տիրապետում իրավիճակին, ինֆորմացիա չունի և չի կարողանում լավ հաշվարկել»,- Tert.am-ին ասել է ՀԱԿ-ի մաս կազմող ՍԴՀԿ ատենապետ Լյուդմիլա Սարգսյանը՝ մեկնաբանելով Ժիրայր Սեֆիլյանի երեկվա այն հայտարարությունը, թե իշխանությունը ՀԱԿ-ին «քցել է»։
«ՀԱԿ-ին ոչ մեկը չի կարող քցել այն պատճառով, որ ՀԱԿ-ը չի արել որևէ բան, որի համար հնարավոր լինի նրան քցել։ Մենք շատ լավ գիտենք այս գործընթացի էությունը»,- ասել է Լյուդմիլա Սարգսյանը՝ հավելելով, որ համամիտ չէ նաև Սեֆիլյանի այն հայտարարությանը, թե իրենք «շվարած են»։ «Մենք լավ գիտակցում ենք իրավիճակը և գիտենք մեր հաջորդ քայլերը»,- նշել է նա։
«ՀԱԿ-ը կշռադատված և պետականամետ գործունեություն է ծավալում, և միգուցե դա չի գոհացնում Սեֆիլյանին»,- ընդգծել է ՍԴՀԿ ատենապետը՝ ավելացնելով, որ քցված լինելու մասին խոսելն ուղղակի միամտություն է։ «Ինչպես ասաց Լևոն Տեր–Պետրոսյանը, սա շախմատ է, որն ունի իր քայլերը»,- նշել է Սարգսյանը։
«Կապիտալ»-ը նաև հայտնում է, որ, անդրադառնալով իշխանության արձագանքին, ՍԴՀԿ ատենապետն ասել է, որ ողջամիտ արձագանքը բխում է երկրի շահերից, իսկ եթե իշխանությունը չարձագանքի իրենց առաջարկին, «Ժողովրդի կամքը, մեկ է, ի կատար է ածվելու, խնդիրը իշխանության ողջամտության մեջ է»։
«Լյուդմիլա Սարգսյանը համոզված է, որ իշխանափոխությունն առաջնահերթ խնդիր է»,- հավելում է թերթը։
