Թերթը տեղեկացնում է, որ Հայաստանի միակ երաժշտական գրադարանը երեկվանից լարված վիճակում է. «Ըստ տեղեկությունների՝ գրադարանի տարածքը վաճառվել է, և մոտ ապագայում գրադարանի աշխատողները և հարուստ գրական ֆոնդը հայտնվելու են փողոցում»։ Երեկ թերթն այցելել է գրադարան՝ տեղում ծանոթանալու իրավիճակին. «Տեղեկությունները, թե մշակույթի նախարար Հասմիկ Պողոսյանը վաճառել է գրադարանի տարածքը, այստեղ արագ էին հասել, և մարդիկ անորոշության մեջ էին և խիստ վրդովված»,- գրում է «Առավոտ»-ը:
«Այս ամենին գումարվել էր նաև այն, որ գրադարանի երկարամյա տնօրեն Գուլո Նահատակյանը հունիսի 7-ին (նամակը նախարարի կողմից ստորագրված էր հունիսի 3-ին) նամակ էր ստացել մշակույթի նախարարից այն մասին, որ ՀՀ Աշխատանքային օրենսգրքի 111 հոդվածի 2-րդ կետով հունիսի 15-ից այլևս նոր պայմանագիր չի կնքվելու տնօրենի հետ»,- հայտնում է «Առավոտ»-ը և հավելում. «Գրադարանի տարածքը վաճառելու մասին տեղեկությունները երեկ մեր աղբյուրները ևս հաստատեցին և պնդեցին, որ ոչ միայն այս, այլև մի քանի այլ մշակութային տարածքներ նախարարը մոտ ապագայում կվաճառի կամ արդեն վաճառել է: Թե ուր են «քշելու» միակ երաժշտական գրադարանը, դեռ ոչ ոք չգիտի: Գրադարանի տնօրենի փորձերը՝ կապվելու նախարարի հետ և հասկանալու իրավիճակը, ապարդյուն են անցել»:
Թերթի տեղեկացմամբ՝ գրադարանի աշխատակագմը խիստ վրդովված է կատարվածով և այն հանգամանքով, որ նախարարը կամ փոխնախարարը նախքան որոշում կայացնելը հարկ չեն համարել խոսել կոլեկտիվի և տնօրենի հետ, պարզաբանումներ տալ. «Մարդիկ շեշտում էին, որ իր աշխատանքային գործունեության ամբողջ ընթացքում տիկին Նահատակյանն աշխատել և աշխատում է որպես նախաձեռնող, բարեխիղճ, նվիրված և գործիմաց մասնագետ: Նրա ղեկավարության տարիներին գրադարանի ֆոնդերը հարստացել են, և այսօր միակ երաժշտական գրադարանում պահվում է այնպիսի երաժշտագիտական հարստություն, որն անգամ օտարներին է զարմացնում և հիացնում։ Գրադարանի կոլեկտիվը պատրաստ է մինչև վերջ պայքարել իր և գրադարանի իրավունքների համար։ Մարդիկ համոզված են, որ նախարարը ինքնագլուխ է նման որոշում կայացրել»։