Թուրքիայի զինված ուժերը հունվարի 20-ից ռազմական նոր արշավ են սկսել քրդերի դեմ Սիրիայի հյուսիսում․ «Ձիթենու ճյուղ» անվանումը ստացած ռազմական գործողություններն իրականացվում են Սիրիայի հյուսիս-արևելյան Աֆրին շրջանում: Նախ գործի է դրվել օդուժը՝ թուրքական կողմի հաղորդմամբ խոցելով 108 թիրախ, իսկ հաջորդ օրը՝ հունվարի 21-ից, սկսվել են նաև ցամաքային գործողությունները: Օդային հարվածների հետևանքով Աֆրինում կան զոհեր, այդ թվում՝ խաղաղ բնակիչներ:
Արևելագետ Սարգիս Գրիգորյանը հիշեցնում է, որ թուրքերը բազմիցս մեղադրել են քրդերին, որ Եփրատ գետի արևմտյան ափ անցնելու դեպքում իրենք դա անմիջական սպառնալիք են որպես դիտարկելու, իսկ Մամբիջ քաղաքը գտնվում է հենց այդ հատվածում, հետևաբար արևելագետը չի բացառում, որ Թուրքիան չի բավարարվի միայն Աֆրինում ռազմական գործողություններ իրականացնելով, այլ դրանք կարող է շարունակել նաև Մամբիջի ուղղությամբ՝ հետագայում նպատակ ունենալով նաև արևելյան հատվածում ևս որոշակի գործողություններ իրականացնել։
«Աֆրինը վերցնելու Թուրքիայի նպատակը բավականին երկար մշակված և կանխամտածված ծրագիր էր և հիմա Աֆրինի ռազմական գործողություններով Թուրքիան ավելի առարկայական է դարձնում իր ներկայությունը Սիրիայի հատկապես քրդաբնակ հատվածում, ինչը նախկինում չկար։
Իսկ ինչու հատկապես Աֆրինը, որովհետև Աֆրինը անկախ էր, այսինքն այն հատվածն էր, որը մնացել էր այսպես ասած՝ անկլավային վիճակում և այստեղ ավելի հեշտ էր ռազմական գործողություններ իրականացնել․ բացի դրանից, եթե թուրքական զորքը մտադրված է մինչև Մամբիջ գնալ, ապա նրանք պետք է ապահովեին իրենց թիկունքը, իսկ Աֆրինը գտնվում է հենց թիկունքում, դրա համար էլ այնտեղից սկսեցին, որ կարողանան հասնեն արևելք»,- «Առաջին լրատվական»-ի հետ զրույցում պարզաբանեց Սարգիս Գրիգորյանը։
Հարցին՝ Թուրքիայի ռազմական այս գործողությունները միջազգային ասպարեզում ի՞նչ հետևանքներ կարող է ունենալ նրանց համար, արևելագետն ի պատասխան նկատեց, որ Թուրքիային այլևս վաղուց չի հետաքրքրում միջազգային արձագանքը։
«Չեմ կարծում, որ կլինի մի այնպիսի ազդակ, որը Թուրքիային կստիպի չշարունակել նման ակտիվ ռազմական գործողությունները Սիրիայում»,-ասաց նա։
Անդրադառնալով նաև այնտեղ բնակվող հայերին սպառնացող վտանգներին, բանախոսը նշեց, որ Թուրքիայի կողմից էթնիկ զտումների սպառնալիք կա, որից կարող են տուժել նաև հայերը։
«Պետք է շատ զգոն լինենք և հասկանանք, որ Թուրքիայից ամեն ինչ սպասելի է»,- շեշտեց Գրիգորյանը։
Մանրամասները՝ տեսանյութում։
