Իրանի Ազգային գազային ընկերության ղեկավար Համիդ Ռեզա Արաքին հայտարարել է, որ Թեհրանը պատրաստ է աշխուժացնել Հայաստանի հետ գործակցությունը գազի մատակարարումների ոլորտում: Իրանցի պաշտոնյան ասել է, թե Իրանը կարող է ավելացնել գազամատակարարումը Հայաստան, բայց Հայաստանը չի կարող ավելացնել էլեկտրաէներգիայի առաքումը դրա դիմաց:
Հայ-իրանական գազային գործակցության թեման նախորդ շաբաթ շրջանառվեց Հայաստանի խորհրդարանում, կառավարության հետ հարցուպատասխանի ընթացքում: «Ծառուկյան» դաշինքը վարչապետ Կարապետյանից հետաքրքրվել էր նոր գազամուզի հնարավորության վերաբերյալ, որը կունենա տարանցիկ թողունակության տրամաչափ:
Կարեն Կարապետյանը պատասխանել էր, որ ամեն ինչ կախված է Իրանից, քանի որ այդպիսի դեպքերում որոշիչը մատակարար պետության դիրքորոշումն է, գազն իրացնելու շուկայի առկայությունը, իսկ Հայաստանը պատրաստ է միշտ:
Իրանագետ, ՄԱՀՀԻ փորձագետ Արմեն Վարդանյանն «Առաջին լրատվական»-ի հետ զրույցում ասաց, որ Իրանի կողմից ագզի մատակարարում որոշակի քանակությամբ հնարավոր է, բայց ոչ այն քանակի, որ դա արտահանվի նաև այլ երկրներ՝ Հայաստանի միջոցով։ «Կարծես թե Հայաստանում հայտարարությունների մակարդակով նման պատրաստակամություն երևում է, եթե հաշվի առնենք, որ գազաբաշխիչ որոշ ցանցեր նվիրվեցին «Գազպրոմին»՝ այդպիսի հնարավորություն կա։ Բայց Հայաստանը երբեք չի կարող դառնալ տարանցիկ երկիր, քանի դեռ գազային բոլոր ենթակառուցվածքները պատկանում են «Գազպրոմին»,-ընդգծեց Վարդանյանը։
Ըստ նրա՝ Ռուսաստանը թույլ կտա փոքր չափաքանակով գազի մատակարարում Իրանի կողմից Հայաստան, որովհետև դա մեծ վտանգ չի սպառնում «Գազպրոմին» և Ռուսաստանի շահերին. «Ռուսաստանի համար ցավալի կլինի, եթե Հայաստանը տարանցիկ երկիր դառնա»։
Հարցազրույցն ամբողջությամբ՝ տեսանյութում։