Հուշարձանագետ Սամվել Կարապետյանը Ամենայն Հայոց Կաթողիկոսի Վրաստան այցից որևէ ակնկալիք չունի:
Նկատենք, որ սպասվում է, որ Կաթողիկոսի այցի ժամանակ քննարկվելու է Վրաստանում գտնվող հայկական եկեղեցիների իրավական կարգավիճակը:
Կարապետյանը նշեց, որ ինքը տեղյակ չէ, թե արդյոք այդ առաքելությունը մտնո՞ւմ է Կաթողիկոսի ծրագրերի մեջ, սակայն ինչ-որ չափով վրացիներին ճանաչելով՝ լավատեսության ոչ մի հիմք չունի. «Իմանալով վրացական կողմի դիրքորոշումը և մեր կեցվածքին ծանոթ լինելով՝ ոչ մի հույս չունեմ»:
Կարապետյանը հիշեցրեց, որ վրացիներն այժմ պահանջում են Հայաստանի տարածքում գտնվող շուրջ 30 եկեղեցիներ, որոնք, սակայն, կառուցել են հայ քաղկեդոնականները և հայկական են. «Իսկ մենք հայկական 450 եկեղեցիներից, որոնց գոնե կեսը դեռ պահպանվել է Վրաստանում, ընդամենը 6-ի նկատմամբ ենք վերադարձման պահանջ դրել: Հիմա չգիտեմ՝ Կաթողիկոսը այդ վեճի հարթման հիմքե՞րը պետք է դնի, թե՞ վրաց ախորժակի դիմացը պետք է առնի»: