Բրազիլիան և Գերմանիան հինգշաբթի պաշտոնապես ՄԱԿ են ներկայացրել բանաձևի նախագիծ, որը կոչ է անում վերջ տալ էլեկտրոնային լրտեսմանն ու համացանցի վրա տարածել մասնավոր կյանքի անձեռնմխելիության իրավունքը, որն ամրագրված է Քաղաքական և քաղաքացիական իրավունքների մասին միջազգային պակտով: Այս մասին հայտնում է ITAR-TASS-ը:
Փաստաթուղթը ներկայացվել է Գլխավոր ասամբլեայում՝ ՄԱԿ-ում երկու երկրների մշտական ներկայացուցիչներ Անտոնիու Պատրիոտայի և Փիթեր Ուիտինգի կողմից: 10 երկրներ հայտարարել են, որ կդառնան փաստաթղթի համահեղինակներ: Նրանք են՝ Ավստրիան, Բոլիվիան, Ինդոնեզիան, Հյուսիսային Կորեան, Լիխտենշտեյնը, Պերուն, Ուրուգվայը, Ֆրանսիան, Շվեյցարիան և Էկվադորը:
Գերմանացի դիվանագետ Ուիտինգը երկրներին կոչ է արել միանալ փաստաթղթի կազմման աշխատանքներին և դրանով իսկ ցուց տալ իրենց պատրաստակամությունը՝ քննարկելու միջազգային մարդասիրական իրավունքի ամենասուր խնդիրներից մեկը:
Բանաձևի նախագծի ներկայացումից հետո սկսվում է բանակցային գործընթացը, որի ընթացքում այլ երկրներ կարող են որոշակի փոփոխություններ մտցնել փաստաթղթում: Ինչպես սպասվում է՝ այն Գլխավոր ասամբլեայի երրորդ կոմիտեում քվեարկության կդրվի նոյեմբերի 27-ից ոչ ուշ: Ընդունման դեպքում դրա դիտարկումը Գլխավոր ասամբլեայի լիագումար նիստին կլինի ձևական:
