Այսօր «Հայելի» ակումբում կազմակերպվել էր ՀՀԿ խմբակցության պատգամավոր Արտակ Զաքարյանի և ՀՅԴ պատգամավոր Արծվիկ Մինասյանի հանդիպումը լրագրողների հետ:
Հանդիպման առիթը կրկին ներքաղաքական վերջին զարգացումներն էին, մասնավորապես՝ ՀԱԿ-ի և իշխանության՝ պատվիրակությունների միջոցով հավանական երկխոսությունները:
Բանախոսները հանդիպման սկզբում անդրադարձան երկու կողմերի վերջին հայտարարություններին, գնահատականներին, ներկայացրին իրենց ավանդական դիրքորոշումը առկա խնդիրների վերաբերյալ:
«Առաջին լրատվականը» առանձնացրել է ասուլիսի ընթացքում Արծվիկ Մինասյանի և Արտակ Զաքարյանի միջև տեղի ունեցած ուշագրավ երկխոսությունը, որը ստորև ներկայացնում ենք որոշ կրճատումներով:
– Ցավոք, քաղաքական ծրագրերով ամբողջությամբ ներկա իշխանությունները, սկսած սոցիալ-տնտեսականից ավարտած ազգային հարցերով, ձախողումների մի տիրույթում են հայտնվել: Եվ գրեթե բոլոր ուղղություններով, բացառությամբ մեկ-երկուսի, ձախողումներն ակնհայտ են: Էստեղից փոխանակ քայլ անելու, փոխանակ ներկա կառավարությանը տուն ուղարկելու և համազգային ներուժ ապահովող, երկրի առջև ծառացած հիմնական մարտահրավերները լուծելու ունակ թիմ ձևավորելու, մենք այսօր գնահատում ենք, որ ներկա իշխանությունները պարզապես ձևական մի օրակարգ են քննարկում: (Արծվիկ Մինասյան)
– Պարոն Մինասյան, ես իհարկե վստահ եմ, որ դուք էլ ձեր ասածների մեծ մասին չեք հավատում և չեք ընդունում, որ իրականում էդպես ա: (Արտակ Զաքարյան)
– Ես էն մարդկանցից չեմ, էլի, որ չհավատալով մի բան ասեմ, պարոն Զաքարյան: (Ա. Մ.)
– Դուք ինքներդ հստակ գիտեք, որ ձախողումներ, որպես այդպիսիք, չկան: (Ա. Զ.)
– Այսինքն՝ մենք հիմա ապրում ենք շատ լա՛վ, աղքատությունը հաղթահարվա՛ծ է, մարդիկ չեն արտագաղթում, երկրի առջև ծառացած չի ղարաբաղյան խնդիրը… (Ա. Մ.)
– Մենք հիմա չենք ապրում պրոբլեմ չունեցող երկրում, մենք ապրում ենք մի երկրում, որտեղ կան բազմաթիվ խնդիրներ: Բայց երբ ասում եք՝ ունեք ձախողումներ, ձախողումներ չեն դրանք: Բազմիցս ասվել է և հիմնավորվել՝ որոնք են խնդիրները, շեղումներն ու օբյեկտիվ պատճառները, որոնք ստիպել են, որպեսզի շատ ծրագրեր ձախողվեն: (Ա. Զ.)
– Օբյեկտիվ պատճառը նախկին կառավարության ժառանգությո՞ւն էր, որ ներկա կառավարությունը փորձում է պատճառաբանել: Օբյեկտիվը ո՞րն է: (Ա. Մ.)
– Ո՛չ, օբյեկտիվ պատճառը տնտեսական ճգնաժամն էր: (Ա. Զ.)
– Մենք կարող ենք էդ ճգնաժամը փաստարկ բերելով՝ մինչև 22-րդ դարը խոսել դրա մասին: (Ա. Մ.)
– Ընդամենը մեկ տարի է անցել հետճգնաժամային զարգացումների համար: (Ա. Զ.)
– Ոչ մի հետճգնաժամային զարգացում չկա, ցավդ տանեմ, մենք ճգնաժամի մեջ ենք, դադարեցրեք էդ ձևական հայտարարությունները. երկիրը ճգնաժամի մեջ է: (Ա. Մ.)
– Երկիրը ճգնաժամի մեջ չէ: Մենք ենք մեր պատկերացումների մեջ, եթե այսպես շարունակենք, հայտնվելու ճգնաժամի մեջ: (Ա. Զ.)
– Լավ, եթե ճգնաժամի մեջ չէ, մեր էսօրվա քաղաքացիների աշխատավարձերն են բարձրացե՞լ, կենսամակարդակն է բարձրացե՞լ: Բա եթե չեն բարձրացել, ինչի՞ մեջ ենք: (Ա. Մ.)
Ի դեպ, Արծվիկ Մինասյանից փորձեցինք ճշտել, թե, իր կարծիքով, ներկա ճգնաժամի, իր թվարկած առկա խնդիրների համար Դաշնակցությունը պատասխանատու չէ՞, բաժին չունի՞ այդ գործում, քանի որ գրեթե միշտ խոսում է իշխանության և արտախորհրդարանական ընդդիմության սխալ քաղաքականության և մեղքերի մասին.
«Ո՞վ ա ասել չունի, մենք ասել ենք՝ չունի՞»,- արձագանքեց ՀՅԴ խմբակցության պատգամավորը:
