Այսօր «Տեսակետ» ակումբում հրավիրված մամուլի ասուլիսի թեման ազգային փոքրամասնությունների դերակատարությունն ու հիմնախնդիրներն էին։ Ասուլիսին ներկա էին Հրեական համայնքի նախագահ Ռիմա Վարժապետյանը, Աթուր-ասորական ասոցիացիայի նախագահ Արսեն Միխայելովը և «Մեդիա Շանգալ» եզդիների ազգային միավորում ՀԿ-ի նախագահ Ամո Շառոյանը:
«Մեր կազմակերպության առաքելությունը լինելու է Հայաստանում և արտասահմանյան երկրներում քրդերի և եզդիների միջև էթնիկական վեճերին վերջ տալը»,- իր խոսքում հայտնեց «Մեդիա Շանգալ» եզդիների ազգային միավորում ՀԿ-ի նախագահ Ամո Շառոյանը:
Անդրադառնալով հունիսի սկզբին Ծաղկաձորում կազմակերպված սեմինարին և ձեռք բերված հաջողություններին՝ հրեական համայնքի նախագահ Ռիմա Վարժապետյանը նշեց. «Շատ լավ էր կազմակերպված, քննարկման էին դրված կարևոր հարցեր, իսկ թե որքանով դրանք կլուծվեն՝ ցույց կտա ժամանակը։ Սկիզբը լավ էր, հետևաբար, մեզ մոտ նաև հույսեր ծագեցին։ Մենք մեր ցանկություններն ու առաջարկները ներկայացրինք, բայց կան հարցեր, որոնք անհատական մոտեցմամբ են լուծումներ պահանջում։ Օրինակ՝ ուսման համար երկրից մեկնած երիտասարդները դժվարանում են վերադառնալ՝ կապված զինծառայության հետ, հակասեմական գրքերի նորացումը և այլն։
Խոսելով ներքաղաքական իրավիճակից և մասնավորապես իշխանություն-ՀԱԿ երկխոսությունից՝ «Մեդիա Շանգալ» եզդիների ազգային միավորման նախագահը նշեց, որ իրենք իրավաբանորեն պաշտպանված են իշխանությունների կողմից, բայց գործնականում կան բացթողումներ. «Օրինակ՝ եթե Պողոսն ու Մստոն հանցագործություն են գործել, պետք չէ ասել, որ Մստոն եզդի է, իսկ Պողոսը՝ հայ, պետք է ասել, որ երկուսն էլ ՀՀ քաղաքացիներ են»։ Նա նաև հայտնեց, որ դիմել են ՊՆ Հանրային խորհրդին՝ իրենց կազմում եզդի ներկայացուցիչ ներառելու խնդրով։ Ամո Շառոյանի խոսքով, իրենք պետք է իրենց ներկայացուցիչն ունենան նաև Ազգային ժողովում։
Իսկ Հրեական համայնքի նախագահ Ռիմա Վարժապետյանն ասաց. «Մենք պաշտպանված ու անվտանգ ենք մեզ զգում իշխանությունների հետ, մենք պետք է իշխանությունների հետ լինենք»։
«Առաջին լրատվական»-ի հարցին, թե ինչն է պատճառը, որ Ազգային փոքրամասնությունները մշտապես գտնվում են իշխանությունների կողքին, և արդյոք ամեն բան հա՞րթ է իրենց կյանքում, որ չկան ընդվզման օրինակներ, Ռիմա Վարժապետյանը պատասխանեց. «Մենք պետք է իշխանությունների հետ լինենք։ Միայն մեզ մոտ չէ վատ վիճակը, համաշխարհային ճգնաժամ է։ Այս բոլոր փոփոխությունները մեզ վախեցնում են։ Եթե ներքաղաքական կյանքում լինեն փոփոխություններ, կլինի կործանում,- և հավելեց,- թեպետ փոփոխությունների համար շատ առիթներ կան»։