ՀՀԿ-ական պատգամավոր Գագիկ Մինասյանը պատվիրակություններով երկխոսելու իմաստ չի տեսնում: Նա նշեց, որ ցանկացած տեղում իշխանության ցանկացած ներկայացուցչի հետ ՀԱԿ-ը կարող է երկխոսել, և պարտադիր չէ սահմանափակ թվով պատվիրակների խումբ ստեղծել: Ավելին՝ նրա գնահատմամբ, երկխոսությունը ոչ միայն իշխանության և ՀԱԿ-ի միջև պետք է լինի, այլև մյուս բոլոր քաղաքական ուժերի միջև. «Եթե ՀԱԿ-ը նախընտրում է, որ երկխոսությունը վարի միայն իրենց ընտրած հինգ հոգանոց պատվիրակությունը, ապա մենք չենք ցանկանում սահմանափակել մեր քաղաքական գործիչների թիվը»:
Մինասյանը նշեց, որ ՀԱԿ-իշխանություն երկխոսությունը կարող է ընթանալ սոցիալական, տնտեսական և մի շարք այլ խնդիրների շուրջ, սակայն՝ ո՛չ արտահերթ ընտրությունների, քանզի արտահերթ ընտրությունների համար ոչ մի իրավական հիմք Հայաստանում այսօր չկա:
Անդրադառնալով ՀԱԿ առաջնորդ Լևոն Տեր-Պետրոսյանի հայտարարությանը, թե «ուզում են՝ թող երկխոսեն, չեն ուզում՝ մեղքն իրենց վիզը», Մինասյանը նշեց. «Շատ անշնորհակալ գործ է նման հայտարարություն անելը։ Ցանկացած քաղաքական գործիչ կարող է շատ բան հայտարարել, սակայն պետք է նշել, որ մենք միշտ էլ պատրաստ ենք երկխոսելու, միայն պետք է ՀԱԿ առաջարկներն առարկայական լինեն, քանզի երկխոսել մի բանի շուրջը, որի համար ո՛չ իրավական, ո՛չ քաղաքական հիմքեր չկան, կարծում եմ՝ իրատեսական չէ»: