Ներկայում իրավիճակն այնպիսին է, որ եթե ոստիկաններն ընդգծված իրողությունների հետևանքով հանդես չեն գալիս, սկսում են դատապարտվել և՛ քաղաքական ուժերի, և՛ ժողովրդի մի մասի կողմից: Այսօր լրագրողների հետ ճեպազրույցում նման կարծիք հայտնեց ԱԺ ՀՀԿ խմբակցության ղեկավար Գալուստ Սահակյանը:
«Ես այն կարծիքին եմ, որ պիտի չհանդուրժել, էդ բեռը ոստիկանությունը պիտի իր ձեռքը վերցներ, առաջին օրվանից պիտի արգելվեր, առավել ևս՝ դուք գիտեք, որ երբ Շանթը կալանավորված էր, իրեն ազատ արձակեցին հոգեկան խանգարումների պատճառով: Դա հենց հիմք պիտի հանդիսանար, որ նա իրավունք չունենար էնտեղ ինչ-որ միտինգ կազմակերպելու կամ նստացույց անելու»,- ասաց նա:
Սահակյանը նկատեց՝ հասարակական գործընթացներն այնպիսին են, որ եթե մի քանի անգամ հասարակական կարգ է խախտվում, և հանդուրժողականություն է ձևավորվում, դրա հետևանքներն ավելի բարդ են լինում, ինչպես վերջին դեպքում:
Հարցին՝ մտավախություն չունի՞, որ կրկին կշահարկվի քաղբանտարկյալ տերմինը, Սահակյանը պատասխանեց, որ դրանք չկարգավորված մտքերի արդյունք են. «Քաղբանտարկյալները նրանք են, ովքեր քաղաքական ֆորմացիաներ են փոխում, բայց մեր երկրում այդ խնդիրը չկա՝ քաղաքական շրջադարձերի նպատակ չկա»:
«Ոստիկանությունում կատարվող բարեփոխումները բերեցին նրան, որ ժողովուրդն ինչ էլ անի՝ մենք պիտի այնպես անենք, որ հանկարծ որևէ բան չլինի նրանց, ավելի լավ է՝ մեզ մի բան լինի, քան ժողովրդին»,- ասաց նա՝ նշելով, որ ոստիկանությունը փորձեց հանդուրժողական մոտեցում ցուցաբերել և նախապես չկանխել Շանթ Հարությունյանի և նրա կողմնակիցների գործողությունները՝ չնայած գիտեր, որ նրանց երթը լինելու է փայտերով և պայթուցիկ նյութերով։
ՀՀԿ խմբակցության ղեկավարի խոսքով՝ բողոքողներն ազատ են իրենց բողոքն արտահայտելու մեջ, բայց հարձակվելն ու կոշտ գործողությունների դիմելը հանցածին են։ Սահակյանի կարծիքով՝ շատերը մտածում են, որ հենց խոսում են իշխանության դեմ, քաղաքական գործիչներ են դառնում, իսկ հենց օրենքը կիրառվում է նրանց նկատմամբ, ուրեմն քաղբանտարկյալ են, սակայն այդպես չի լինում, և արդեն ծիծաղելի է «քաղբանտարկյալ» հասկացությունը։
Հարցին՝ ո՞ր իրավիճակում Սերժ Սարգսյանը հրաժարական կտա, Սահակյանը պատասխանեց. «Որևէ իրավիճակում Սերժ Սարգսյանը հրաժարական չի տա։ Սովորական ժողովրդավարական ձև է հրաժարական պահանջելը։ Կան հրաժարական պահանջողներ, բայց այդ պահանջողներից յուրաքանչյուրն իր ստվերային կողմն ունի՝ իբր ընդդիմություն ենք, ավելին կարող ենք անել։ Ես դեռևս չեմ տեսել որևէ քաղաքական թիմ, որը կարող է ավելին անել՝ հատկապես, երբ այսօրվա ընդդիմության շարքերում նախկին իշխանության ներկայացուցիչներն են»։
