Այսօր լրագրողների հետ հանդիպման ժամանակ Հայաստանի կոմունիստական կուսակցության առաջին քարտուղար Ռուբեն Թովմասյանը նախ նշեց, որ արտախորհրդարանական ուժերից «իսկական ընդդիմությունը Կոմունիստական կուսակցությունն է», այլ ոչ թե, օրինակ, ՀԱԿ-ը, և ավելացրեց, որ իրենք նույնիսկ «ընդդիմությանն են ընդդիմություն»։
Անդրադառնալով ՀԱԿ-ի և իշխանությունների միջև տեղի ունեցող գործընթացներին, պատվիրակությունների միջոցով հնարավոր երկխոսությանը՝ Ռուբեն Թովմասյանը հարց ուղղեց լրագրողներին. «Ինչի՞ շուրջ պիտի բանակցեն այն իշխանությունների հետ, որոնք քանդել են երկիրը, այն իշխանությունների հետ, որոնք ստեղծել են լափելու նպաստավոր պայմաններ, այն իշխանությունների հետ, որոնք երկրի հարստությունը տվել են օտարներին և իրենց մերձավորներին»։
Ռուբեն Թովմասյանը, որը պահանջեց, որ իրեն դիմեն ոչ թե «պարոն»-ով, այլ «ընկեր»-ով, հորդորեց ժողովրդին, որ մեկընդմիշտ իմանա. «Իրենց փրկությունը սոցիալիստական գաղափարախոսությունն է։ Հայ ժողովրդի փրկությունը, ինչպես 1920-ական թթ., Կոմունիստական կուսակցությունն է»։
Ինչ վերաբերում է ՀԿԿ-ի հավանական համագործակցությանը ՀԱԿ-ի կամ այլ քաղաքական ուժերի հետ՝ Ռուբեն Թովմասյանը հայտարարեց, որ հատկապես ՀԱԿ-ի հետ «բանակցությունները կամ մոտեցումները» իսպառ բացառում է.
«Չեմ թաքցնում, ինձ շատ են դիմել այդ հարցով ՀԱԿ-ից և այնպիսի ներկայացուցիչներ ՀԱԿ-ից, որոնք ծանրակշիռ տեղ ունեն ՀԱԿ-ի գործունեության մեջ»։
