Արծվիկ Մինասյանը կարծում է, որ Հայաստանի քաղաքական օրակարգը արհեստականորեն ձևախեղվում է, և երկխոսությունն ամենևին էլ երկրի առջև ծառացած հիմնական խնդիրներից չէ։
«Թե՛ ՀԱԿ-ի պատասխաններից, թե՛ իշխանության պատասխաններից ակնհայտ երևում է, որ նրանք ոչ միայն երկխոսել են, երկխոսում են և շարունակելու են երկխոսել, այլ նաև նրանց շախմատային խաղի մեջ դա դրսևորվում է յուրահատուկ քայլերի կոմբինացիայի տեսքով»,- լրագրողների հետ հանդիպման ժամանակ համոզմունք հայտնեց ՀՅԴ խմբակցության պատգամավոր Արծվիկ Մինասյանը:
Ինչ վերաբերում է երկխոսությունը ֆորմալ դաշտ տեղափոխելուն և ՀԱԿ-ի՝ պատվիրակությունով երկխոսելու առաջարկին՝ Արծվիկ Մինասյանը նշեց. «Այս կերպ շախ արվեց իշխանությանը: Հիմա իշխանությունը, ինչպես յուրաքանչյուր շախմատիստ, պետք է մտածի ոչ միայն շախը չեզոքացնելու, այլև մեկ այլ շախ դիմացինին ներկայացնելու մասին: Որպես չեզոքացման կամ շեղելու մեխանիզմ են կիրառվում իշխանության տարբեր ներկայացուցիչների տարբեր հայտարարությունները»։ Սակայն Մինասյանը կարծում է, որ վերջնական շախը պետք է ներկայացնի Սերժ Սարգսյանը։