Լուրեր
Մարդ չի մնացել, մարզ ենք մեկնում դատարկ մեքենաներով․ վարորդները դժգոհ են՝ «պլանը մեր ջեբից ենք փակում»
  • 10:41
  • 2018-01-15
  • Դիտումներ՝ *

Ինչպես հայտնի է, հունվարի 1-ից ակցիզային հարկով պայմանավորված թանկացել է բենզինը, դիզվառելիքը, սեղմված գազը, որն առաջիկայում անմիջականորեն ազդելու է տրանսպորտի սակագնի վրա։ Նախօրեին արդեն Երևան-Հրազդան երթուղին սպասարկող ընկերությունը սակագինը 400 դրամից դարձրել էր 500 դրամ։ Երեկ, սակայն, թերևս բարձրացված աղմուկի պատճառով, ընկերությունը վերանայել է սակագինը և ուղևորափոխադրում է իրականացնում նախկին սակագնով։

«Առաջին լրատվական»-ը շրջեց Երևանի ավտոկայաններով հասկանալու համար՝ արդյո՞ք միջքաղաքային այլ երթուղիներ ևս թանկացրել են սակագինը, թե՞ ոչ։ «Կիլիկիա» ավտոկայանում, որտեղից ՀՀ մարզերի տարբեր ուղղություններով երթուղայիններ են մեկնում, սակագնի ոչ մի թանկացում չկար։ Ավտոկայանի տնօրինությունից մեզ տեղեկացրեցին, որ սակագինը կարող է թանկանալ միայն նախարարության համապատասխան գրության և երթուղին սպասարկող ընկերության պայմանավորվածության հիման վրա։

Ինչ վերաբերում է վարորդներին, ապա նրանց մեծ մասը խուսափում էր տեսախցիկից։ «Մենք վարորդ ենք, մեզ ասում են քշեք, քշում ենք, ուղեվարձը բարձրացնելը մեր գործը չէ։ Մեզ ոնց ասում են, այնպես էլ անում ենք»,- ասաց Երևան-Էջմիածին երթուղու վարորդներից մեկը։

Վարորդները, սակայն, դժգոհում էին, որ առանց սակագին բարձրացնելու հնարավոր չէ այլևս աշխատել, քանի որ ուղևորների թիվը նվազել է, իրենք հիմնականում մարզ են մեկնում կիսադատարկ մեքենաներով։

Արդյունքում ոչ միայն պլանի գումարը չեն կարողանում վճարել, այլև իրենց գրպանից էլ լիցքավորում են մեքենաները։ «200-2500 դրամ տուժում ենք մեկ լիցքավորման մեջ»,- ասաց վարորդներից մեկը։

Ուղեվարձի թանկացում չկար նաև Հյուսիսային ավտոկայանից Դիլիջան, Սևան, Իջևան, Մարտունի և այլ ուղղություններով։ Տոմսավաճառն ասաց, որ որևէ քննարկում չի էլ եղել սակագինը վերանայելու մասով։ Բայց վարորդները դժգոհում էին, որ այլևս հնարավոր չէ այս պայմաններով աշխատել։

Առավել մանրամասն՝ տեսանյութում։

  • Դիտումներ՝ *