Աֆրիկյան երկրների հետ փոխհարաբերությունների հարցերով Ռուսաստանի Դաշնության նախագահի հատուկ ներկայացուցիչ Միխայիլ Մարգելովն ասել է, որ Մոսկվայում մոտ ժամանակներում ընդունելու է սիրիական ընդդիմության ներկայացուցիչներին: Այս մասին նա ասել է RIA-Novosti գործակալությունում տված մամուլի ասուլիսի ժամանակ:
«Մոտ ժամանակներս ես Մոսկվայում կընդունեմ Սիրիայի ընդդիմության պատվիրակությանը: Ես նախատեսում եմ դա անել»,- ասել է Մարգելովը: Նա նաև պատմել է Լիբիայի հակամարտության երկու կողմերի հետ ունեցած հանդիպումների մասին: Խոսելով Տրիպոլի մեկնելու և Քադաֆիի հետ հնարավոր հանդիպման մասին՝ Մարգելովն ասել է, որ նախատեսում է հանդիպում ունենալ Լիբիայի առաջնորդի հետ և այդ նպատակով մեկնել Տրիպոլի, եթե ՆԱՏՕ-ի ղեկավարությունն անվտանգության համապատասխան երաշխիքներ տա:
Հիշեցնենք, որ «Մեծ ութնյակի» գագաթնաժողովից հետո Ռուսաստանն ավելի ակտիվ միջնորդական գործունեություն է սկսել իրականացնել տարածաշրջանում: Մարգելովը մասնավորապես հանդիպել է Բենղազիում ապստամբների ներկայացուցիչների, ինչպես նաև Քադաֆիի զարմիկի հետ: Վերջին այս հնադիպումը տեղի է ունեցել Կահիրեում: