Պատասխանելով «Հայկական Ժամանակ» թերթի հարցին, թե ինչպես է ինքը վերաբերվում պատվիրակությունների մակարդակով Կոնգրեսի և իշխանության միջև երկխոսության գաղափարի նկատմամբ ՀՀԿ-ական շրջանակների դրսևորած մերժողական կեցվածքին՝ Հայ ազգային կոնգրեսի առաջնորդ, Հայաստանի հիմնադիր նախագահ Լևոն Տեր-Պետրոսյանը ասել է. «Որոշումների կայացման (decision making) գործում զրոյական դերակատարություն ունեցող անձանց կարծիքը տվյալ պարագայում որևէ նշանակություն չունի: Հետևաբար, քանի դեռ իր տեսակետը չի արտահայտել Սերժ Սարգսյանը, անիմաստ է այդ մասին որևէ բան ասել»:
«Առաջին լրատվականի» հետ զրույցում փիլիսոփայության դոկտոր, պրոֆեսոր Լյուդմիլա Հարությունյանը նշեց, որ սա ճշգրտում է և սրանով Լևոն Տեր-Պետրոսյանը հստակեցնում է, թե ում է համարում բանակցող կողմ. «Տեր-Պետրոսյանը, որպես քաղաքական ուժի առաջնորդ, քաջ գիտի, որ Հայաստանը նախագահական պետություն է, և մեկ այլ ատյանի հետ երկխոսելն օգուտ չունի: Հարցերը Հայաստանում լուծում է նախագահը և հենց նրա տեսակետին սպասելը շատ ճիշտ դիրքորոշում է»:
Հարությունյանը հիշեցրեց, թե ինչպես էր որպես միջնորդ ցանկանում հանդես գալ օմբուդսմենը, սակայն նրան ասեցին, որ իրենք միջնորդի կարիք չունեն. «Այժմ էլ խորհրդարանն է մեջտեղ եկել, սակայն ընդդիմությունը հստակեցրեց, որ նրանց հետ էլ չի բանակցելու: Կողմերը պետք է լինեն հավասարազոր և պետք է ընկալվեն որպես հավասարներ: Քաղբանտարկյալներին բաց թողնելուց հետո ՀԱԿ-ն իրեն ավելի ազատ և հավասար է զգում և պարզ է, որ ուզում է բանակցել հենց նախագահի հետ:
Գործընթացն առաջ է գնում՝ այժմ պարզում են ֆորմատը, հետո նոր կլինի այն հարցը, թե ինչի շուրջ են բանակցում»:
Լյուդմիլա Հարությունյանը նշեց, որ Սերժ Սարգսյանի պատասխանը չի ուշանում, նա մայիսի 28-ի իր ուղերձում արդեն ասել է իր տեսակետը՝ ասել է, որ ավտորիտարիզմից գնալու է դեմոկրատիա. «Ուղերձում ասվել է ամեն ինչ, բայց այս դադարը սպասելի էր։ Քաղբանտարկյալներին ազատ արձակելուց հետո պրոցեսը թափ հավաքեց, բայց իշխանությունները պատրաստ չեն՝ նրանք ավտորիտար մշակույթի կրող են: Այս իշխանությունները պրոցեսը դանդաղացրել են, քանզի չեն հասցնում պրոցեսն արագ սպասարկել՝ ինստիտուցիոնալ, քաղաքական մշակույթի վերափոխումը շատ ծանր պրոցես է»:
Հարությունյանի գնահատմամբ պրոցեսն այժմ ռուսական արտահայտությամբ՝ спустили на тормоза.
