Նավթ արտահանող երկրների կազմակերպության (ՕՊԵԿ) գլխավոր քատուղար Աբդալլահ Սալեմ Ալ-Բադրին հերքել է որոշ լրատվամիջոցներում հայտնված այն տեղեկությունը, համաձայն որի, այդ կազմակերպությունը փլուզման եզրին է, քանի որ Վիեննայում կայացած ՕՊԵԿ-ի կոնֆերանսը տապալվել է, երբ երկրները չեն կարողացել համաձայնեցնել նավթի քվոտաները, որոնք բաժին են ընկնում անդամ կազմակերպության յուրաքանչյուր երկրի:
«Մենք, իհարկե, հիասթափված ենք այն հանգամանքից, որ չենք կարողացել համաձայնության գալ, սակայն դա աշխարհի վերջը չէ: Մենք առաջ էլ էինք դժվարությունների հանդիպում բանակցային գործընթացում և միշտ դրանք հաղթահարում էինք»,- ասել է Աբդալլահ Ալ-Բադրին: Այս մասին հաղորդում է ITAR-TASS գործակալությունը:
Նախատեսվում էր, որ այդ կազմակերպությունը ՕՊԵԿ-ի քվոտաների ընդհանուր քանակը կմեծացներ 24.85 միլիոն բարելից մինչև 26.3 միլիոն բարել: Այս առաջարկին կողմ էին Սաուդյան Արաբիան, Քուվեյթը և ԱՄԷ-ն, դեմ էին` Իրանը, Իրաքը և Վենեսուելան: Հակասություններն այնքան են խորացել, որ կողմերը չեն կարողացել նույնիսկ համաձայնեցնել հաջորդ հանդիպման ժամկետները։
Իրանը կողմ արտահայտվող երկրներին մեղադրում է, թե նրանք գործում են նավթ ներմուծող երկրների ճնշման տակ, որոնք ցանկանում են, ավելացնելով նավթի արդյունահանումը, ապահովել համաշխարհային նավթային գների ցածր մակարդակը: Այս իրադարձությունների ֆոնի վրա երեկ զգալիորեն աճել են նավթի գները թե՛ Նյու Յորքի և թե՛ Լոնդոնի բորսաներում: