Ռուսաստանը դեմ է ՄԱԿ-ի Անվտանգության խորհրդում ընդունված Սիրիայի հարցով ցանկացած բանաձևի, քանի որ իրավիճակն այդ երկրում չի սպառնում համաշխարհային անվտանգությանը: Այս մասին լրագրողներին ասել է Ռուսաստանի փոխարտգործնախարար Ալեքսանդր Լուկաշևիչը: Այս մասին հաղորդում է RIA-Novosti գործակալությունը:
Նա շեշտել է, որ իրավիճակի բարելավմանը չեն նպաստում նաև Սիրիայի արևմուտքում գտնվող ընդդիմության կոչերը, որոնք կողմ են ներկայիս ռեժիմի տապալմանը: «Լուրջ անհանգստություն են առաջացնում տեղեկությունները, որոնց համաձայն՝ ծայրահեղական կազմակերպություններն անցնում են հակամարտության զինված փուլի՝ բանակի ստորաբաժանումների ու իրավապահների միջև, ինչը հանգեցնում է լրացուցիչ լարման ու բռնությունների, ինչպես նաև առկա խնդիրների՝ խաղաղ ճանապարհով լուծելու բացառման»,- ասել է նա:
«Առաջին լրատվականը» այսօր արդեն տեղեկացրել է, որ Ֆրանսիան և Մեծ Բրիտանիան ՄԱԿ-ի ԱԽ են ներկայացրել բանաձև, որով դատապարտում են Սիրիայի իշխանությունների գործողությունները խաղաղ ցուցարարների դեմ՝ կոչ անելով դադարեցնել այդ գործելակերպը: Իսկ Ֆրանսիայի արտգործնախարար Ալեն Ժյուպեն զգուշացրել է Ռուսաստանին, որ այդ երկիրը կկրի Սիրիայում տեղի ունեցող զարգացումների ողջ պատասխանատվությունը, եթե կիրառի վետոյի իրավունքն այս բանաձևն ընդունելիս:
