Ադրբեջանական APA լրատվական գործակալության փոխանցմամբ, Ռուսաստանի ԱԳՆ-ի պաշտոնական ներկայացուցիչ Ալեքսանդր Լուկաշևիչն անդրադարձել է ղարաբաղյան հակամարտության կարգավորմանը.
«Շատ մեծ հույսեր կան, որ դովիլյան հայտարարությունը հակամարտող կողմերին կօգնի գիտակցելու այն սահմանագիծը, ուր հասել է քաղաքական կարգավորման գործընթացը։ Առջևում հիմնարար սկզբունքների ընդունման կոնկրետ առաջադրանքն է։
Կողմերի համար հակաարդյունավետ կլինի այդ գործընթացի ձգձգումն ու դատարկ հռետորությամբ զբաղվելը։ Նախագահներին ուղղված ազդանշանն այն է, որ պետք է պայմանավորվել, պետք է ընդունել այդ սկզբունքները և աշխատել առավել մեծ փաստաթղթի վրա, որը կորոշակիացնի այդ կարգավորման չափանիշները»։
Հիշեցնենք, որ Օբամայի, Մեդվեդևի ու Սարկոզիի դովիլյան հայտարարության մեջ ասվում էր, որ Հայաստանի ու Ադրբեջանի նախագահներն իրենց ժողովրդին պետք է պատրաստեն խաղաղության և ոչ թե պատերազմի։ Բացի այդ, նրանք նշել էին, որ մարտի 5-ին Սոչիում քննարկված հիմնարար սկզբունքների վերջին տարբերակը արդար և կշռված հիմք է ստեղծում՝ խաղաղության պայմանագրի մշակման համար։
