Այսօր ԼՂՀ նախկին արտգործնախարար Արման Մելիքյանը ԱԺ ՀՀԿ խմբակցության անդամ Մանվել Բադեյանի հետ բանավեճի ընթացքում հայտարարել է. «ՀԱԿ առաջնորդն իր թեկնածությունը դնելու իրավունք չունի՝ տարիքային սահմանափակման պատճառով»։ Ըստ Մելիքյանի` «եթե դրվում է ՀԱԿ առաջնորդի՝ նախագահ դառնալու խնդիրը, ապա պետք է Սահմանադրությունը փոխել, իսկ դրա համար պետք է գործող իշխանության հետ նորից գործարքի գնալ»։
«Առաջին լրատվականն» այսօր կեսօրից հետո Արման Մելիքյանի հետ հեռախոսազրույցում` հղում կատարելով լրատվական կայքերում տեղ գտած նրա վերոնշյալ հայտարարությունը, նկատեց, որ ՀՀ Սահմանադրության 50-րդ հոդվածը տարիքային միայն մեկ սահմանափակում է ամրագրում, այն է` «Հանրապետության Նախագահ կարող է ընտրվել երեսունհինգ տարին լրացած յուրաքանչյուր ոք»:
Արման Մելիքյանին խնդրեցինք մեկնաբանել, թե ի՞նչն է հիմք հանդիսացել նման հայտարարություն անելու համար, սակայն Ա.Մելիքյանը խնդրեց մեզ զանգահարել «մեկ ժամից», իսկ «Առաջին լրատվականը» նրան խնդրեց մինչ մեկ ժամը լրանալը` թերթել ՀՀ Սահմանադրությունը, որպեսզի մեր խոսակցությունն ավելի հստակ լինի: Սակայն արդեն հինգ ժամ է, ինչ Արման Մելիքյանը չի պատասխանում մեր հեռախոսազանգերին:
Ուստի ներկայացնենք ՀՀ Սահմանադրության 50-րդ հոդվածը, որը հստակ սահմանում է, թե ով կարող է առաջադրվել որպես ՀՀ նախագահի թեկնածու.
«Հանրապետության Նախագահն ընտրվում է Հայաստանի Հանրապետության քաղաքացիների կողմից` հինգ տարի ժամկետով:
Հանրապետության Նախագահ կարող է ընտրվել երեսունհինգ տարին լրացած, վերջին տասը տարում Հայաստանի Հանրապետության քաղաքացի հանդիսացող, վերջին տասը տարում Հանրապետությունում մշտապես բնակվող և ընտրական իրավունք ունեցող յուրաքանչյուր ոք:
Նույն անձը չի կարող ավելի քան երկու անգամ անընդմեջ ընտրվել Հանրապետության Նախագահի պաշտոնում»:
