Հայաստանի պետական տնտեսագիտական համալսարանի ինովացիոն և ինստիտուցիոնալ հետազոտությունների կենտրոնի ղեկավար Ատոմ Մարգարյանը իրատեսական է համարում Սերժ Սարգսյանի հնչեցրած ցուցանիշը՝ 2018 թ-ին ակնկալվող տնտեսական աճի վերաբերյալ։
Հիշեցնենք, որ Սերժ Սարգսյանը դեկտեմբերի 21-ին ելույթ ունենալով Հայաստանի գործարար համայնքի ներկայացուցիչների համար Ամանորի և Սուրբ Ծննդյան տոների առթիվ նախագահականում կազմակերպված ընդունելության ժամանակ՝ հայտարարել է, որ 2018թ-ին ավելի լավ արդյունքներ են գրանցվելու և 6 տոկոսից ավել տնտեսական աճ է արձանագրվելու։
«Հինգ տոկոս միջին հաշվով տնտեսական աճը, որը այս կառավարությունը սահմանել է , ձևակերպել է իր օրակարգում և միջնաժամկետ ծրագրի հիմքում է դրել, թերևս իրատեսական է։ Պետք է հաշվի առնենք այն իրողությունները և գործոնները, որոնք այս տարվա ընթացքում ձևավորվել են և, հավանաբար, կշարունակվեն հաջորդ տարվա ընթացքում հետագծի շրջանակներում: Այս տարվա 11 ամիսների ընթացքում հունվար-նոյեմբերին տնտեսական ակտիվության ցուցանիշը 7.3% է»,-ասաց Ատոմ Մարգարյանը։
Վերջինիս դիտարկմամբ՝ տարին նախևառաջ բարենպաստ է եղել արդյունաբերության համար՝ թե՛ արտադրության, թե՛ արտահանումների մասով՝ 11,3 տոկոս աճ է եղել , ինչը պայմանավորված է հիմնականում հանքարդյունաբերությամբ, պղնձի բարձր գներով։
«Կոնյուկտուրան այս տարի շատ բարձր էր հատկապես պայմանավորված Չինաստանի ներկայացրած բարձր պահանջարկով , չինական տնտեսությունն աճում է, այս տեսանկյունից կարելի է ասել ամբողջ աշխարհը զգում է դա , այդ թվում մեր հանքարդյունաբերության սեկտորը։ Երկրորդը՝ նախորդ տարվա համեմատ այն բացասական տենդենցները, որ առկա էր գյուղատնտեսության և շինարարության ոլորտում՝ այս տարի շտկվել է։ Այս տարի տեսնում ենք, որ նախևառաջ շինարարության ոլորտում վերականգնվել է աճը, ճիշտ է շատ թույլ՝ 0.4%, բայց վերականգնվել է: Գյուղատնտեսության ոլորտում էլ նախորդ տարի շատ մեծ էր անկումը, իսկ այս տարվա 11 ամսվա տվյալներով դեռ 3.9%–ի անկում կա»,-նշեց տնտեսագետը։
Նրա կարծիքով՝ աճի վրա ազդեցություն է ունեցել նաև Ռուսաստանի գործոնը, տնտեսության ակտիվացումը , մասնավոր տրանսֆերտների մոտ 20% աճ է գրանցվել։
Մանրամասները՝ տեսանյութում։
