Ի պաշտպանություն քաղբանտարկյալ, «Հայկական ժամանակ» օրաթերթի գլխավոր խմբագիր Նիկոլ Փաշինյանի՝ Սարյանի արձանին հարակից պուրակում հավաքվել էին ազատ մամուլի եւ ինտերնետային կայքերի խմբագիրները: Ակցիային մասնակցում էին «Ժամանակ», «Հայկական ժամանակ», «168 ժամ», «Հրապարակ», «Չորրորդ իշխանություն»,«Առավոտ», «www.news.am», «Լրագիր», «Արմենիա թուդեյ», «Ա1+», «Հետք», «www.epress.am» թերթերի եւ ինտերնետային կայքերի խմբագիրներն ու լրագրողները: Չնայած նախօրոք տարածված հայտարարությանը, բացի Գյումրիի «Գալա» հեռուստաընկերությունից եւ «ԱԼՄ»-ից՝ այլ հեռուստաընկերություններ չէին միացել իրենց գործընկերոջ նկատմամբ կիրառված բռնությունները դատապարտող ակցիային: Նիկոլ Փաշինյանի կինը` Աննա Հակոբյանը, «Առաջին լրատվական»-ի հետ զրույցում տեղեկացրեց, որ Նիկոլի հետ տեսակցության ժամանակ տեսել է նրա վրա կապտուկներ եւ բռնության հետքեր: Նա ասաց, որ Նիկոլը որեւէ խնդիր չի ունեցել իր խցում գտնվող բանտարկյալների հետ, եւ իշխանությունները, տարածելով այդ տեղեկատվությունը, փորձում են արդարացնել իրենց գործունեությունը: Աննա Հակոբյանը նշեց, որ այդ ամենի նպատակը Նիկոլին լռեցնելն է եւ նրան լրագրողական եւ քաղաքական գործունեությունից հեռացնելը: Խմբագիրները ընդունեցին հայտարարություն, որը տարածելու են ԶԼՄ-ներով: