Росбалт լրատվական գործակալության փոխանցմամբ, ոստիկանները Ստավրոպոլում կանխել են հայ և թուրքմեն շինարարների բախումը, որը կարող էր հանգեցնել անկանխատեսելի հետևանքների։
Մարզի ներքին գործերի գլխավոր վարչությունը հաղորդել է, որ վիճաբանությունը Ստավրոպոլի շինհրապարակներից մեկում ծագել է կենցաղային հողի վրա։ Եկվոր բանվորները սկսել են վիճել, թե իրենց բրիգադներից որ մեկն է ավելի որակով կատարում շինարարական աշխատանքները։ Չգտնելով անհրաժեշտ փաստարկներ` թուրքմենները գանգատվել են իրենց հայրենակիցներին, հայերն էլ հայերին են գանգատվել։ Հաշիվները պարզելու համար հայերն ու թուրքմենները պայմանավորվել են հանդիպել քաղաքի մերձակայքում գտնվող մի տարածքում, ուր երկու տասնյակ մեքենաներով ժամանել է մոտ 60 մարդ։
Հնարավոր բախման վայր է մեկնել նաև այդ մասին տեղեկություններ ստացած ոստիկանների հատուկ խումբը, որը տեղում 27 մարդու է ձերբակալել։ Իրավապահները հանդիպման վայր ժամանած հայերի և թուրքմենների մեքենաներում հայտնաբերել և առգրավել են մեկ պոմպային հրացան և երկու դանակ, հարուցվել է քրեական գործ՝ խուլիգանության հոդվածով։